मन्त्रिपरिषद् विस्तार / सपथ ग्रहण कन्हय्
प्रधानमन्त्री झलनाथ खनालं नेकपा (एमाले) पाखें झिंनिम्ह मन्त्रीत थप यानाः स्वक्वःगु खुसिइ मन्त्रिपरिषद् विस्तार यानादीगु दु ।
एनेकपा (माओवादी)नाप गृहमन्त्रालयया बारे खँ मिलेमजुइवं प्रधानमन्त्री खनालं एमालेपाखें जक मन्त्री थप यानाः मन्त्रिपरिषद् विस्तार यानादीगु ख: । वय्कलं थःगु पार्टीपाखें न्याम्ह मन्त्री व न्हय्म्ह राज्यमन्त्री थप यानादीगु दु ।
स्वक्वःगु खुसिइ विस्तार याःगु मन्त्रिपरिषदय् उर्मिला अर्या स्थानीय विकास, रघुवी महासेठ सिँचाइ, गोकर्ण विष्ट ऊर्जा, भानुभक्त जोशी वन तथा भूसंरक्षण व युवराज कार्कीयात सामान्य प्रशासन मन्त्रीया जिम्मा बिउगु दु ।
अथेहे राज्यमन्त्रीलय् राधा ज्ञवाली शिक्षा, शत्रुघन महतो स्थानीय विकास, दलबहादुर सुनार सिँचाइ, रामजी शर्मा ऊर्जा, डम्बर सम्बाहाम्फे सामान्य प्रशासन, भगवती चौधरी वन तथा भूसंरक्षण व ल्हारक्याल लामा अर्थ राज्य मन्त्री कथं दु ।
प्रधानमन्त्री खनालं विस्तारित मन्त्रिपरिषदय् दुथ्याःपिं मन्त्रीतय् नां पद विभाजन सहित राष्ट्रपतिया ज्याकूथी छ्वयेधुंकूसां थौं राम नवमिया सार्वजनिक बिदा जूगुलिं मन्त्रीतय् सपथ ग्रहण कन्हय् जक जुइगु जूगु दु ।
