एमाले नेता विष्टयात संघातिक हमला / अपराधीतय्त त्वतेमखु : प्रम
वर्तमान मन्त्रीमण्डलय् उर्जा मन्त्रीया निंतिं प्रस्ताव याःम्ह एमालेया केन्द्रीय दुजः गोकर्ण विष्टयात अज्ञात पुचलं सांघातिक हमला याःगु दु ।
सोमवाः बहनी ८ बजे गोंगबु टाउनप्लानिङ स्थित थःगु हे छेँ नापसं वय्कःयात खुकुरी प्रहार याःगु खः । लोडसेडिङया इलय् मोटरसाइकलय् च्वनावःपिं निम्ह म्हःमस्यूपिं मनूतय्सं या:गु खुकुरी प्रहार पाखें वय्कःया छ्योनय् व ल्हातय् घाः लाःगु दु । सोह्रखुट्टेस्थित मनमोहन अस्पतालय् वासः याकातम्ह विष्टया स्वास्थ्य अवस्था खतरामुक्त जूगु खँ धाःगु दु ।
वय्कःयात नापलाय्त थौं प्रधानमन्त्री झलनाथ खनाल अस्पताल थ्यंकादीगु दु । वय्कःया स्वास्थ्य अवस्थाया जानकारी कायेधुंकाः प्रधानमन्त्री खनालं विष्टयात आक्रमण याःपिंत याकनं कानूनी दायराय् हयेगु धयादिसें अपराधीतय्त कारवाही यायेगु प्रतिबद्धता प्वंकादिल ।
थ्वस्वयां न्ह्यः म्हिग हे रक्षामन्त्री विष्णु पौडेल, एमाले प्रचार विभाग प्रमखु प्रदीप ज्ञवाली लगायत नेतातय् अस्पताल थ्यंकादीगु खः ।
