खिलराज रेग्मीयात प्रधानन्यायाधीशय् सिफारिस

संवैधानिक परिषदं सर्वोच्च अदालतया वरिष्ठ न्यायाधीश खिलराज रेग्मीयात प्रधानन्यायाधीशया निंतिं सिफारिस याःगु दु ।

वर्तमान प्रधानन्यायाधीश रामप्रसाद श्रेष्ठ लिपा निगूगु वरियताया रेग्मी वरिष्ठता व आःतक छुं नं विवादय् मवगु हुनिं परिषदं वय्कःया नां प्रधानन्यायाधीशय् सिफारिस याःगु खः । प्रधानमन्त्री झलनाथ खनाल अध्यक्ष जुयादीगु परिषदया थौं च्वंगु मुँज्यां वय्कःया नां सर्वसम्मतीं सिफारिस याःगु खः ।

आः रेग्मीया नां व्यवस्थापिका संसदया संसदीय सुनुवाइ समितिलय् छ्वइसाः अन सुनुवाइ क्वचायेवं वय्कःयात प्रधानन्यायाधीशय् नियुक्त याइ । वर्तमान प्रधानन्यायाधीश श्रेष्ठं वइगु वैशाख २२ गते अवकास प्राप्त यानादीत्यंगु दु ।