भैलःद्यःया रथ क्वःदलाः बिस्काः जात्रा स्थगित

ख्वप (सन्ध्या टाइम्स)/बिस्काः जात्राया न्हापांगु न्हि म्हिगः आइतवाः थःने क्वःने भैलःखः सालेगु झ्वलय् ख्वपया इनाचोय् बिस्काः जात्राय् रथया न्ह्यःनेया देपाय् च्वंगु चक्का लिहां वयाः रथ हे क्वःदःगु दु ।

बहनी साढे १० बजेपाखे थःनेपाखे यंकाच्वंगु रथयात हाकनं क्वःने हयेत सालाच्वंगु इलय् आकाझाकां देपापाखेया चक्का स्वाराक्क लिहां वयाः चक्का च्वनीगु अंसिँ बँय् चूवंगु खः। अथे बँय् चूवंगु अंसिँ पम्हुयाः त्वःधुलाच्वंगुलिं आः उगु अंसिँ महिउतले जात्रा न्ह्याके मफइगु जुयाः जात्रा हे स्थगित जूवंगु दु ।

थौं स्वयां सछिदँ न्ह्यः नं थथे हे इनाचो त्वालय् भैलःखः क्वःदःगु खः। तसकं झ्यातुगु व सिँयासिं जक दयेकातःगु जुयाः भैलःखः छक्वलं क्वःमदइगु विश्वास यानातःगु खः। थगुने बेतासिँ त्वःधुलाः भैलःखःया जात्रा हे दिवंगु खःसा थुगुसी धाःसा रथ इनाचोय् थानाच्वंगु दु। भैलःखः जात्रा स्वयेत वःपिं आपालं मनूत अथे अंसिँ त्वःधुलाः भैलःखः क्वःदःगु खनेवं ग्यानाः बिसिउँवंगु खः। अथे खःसां तुलनात्मक रुपं न्हापा न्हापा स्वयां थुगुसीया जात्रा धाःसा शान्तिपूर्ण रुपं न्ह्याःगु दु। आः तक नं सुरक्षा निकायं सुं घाः लाःगु वा सुयातं ज्वनेमाःगु स्थिति मवःगु खँ धाःगु दु। प्रत्यक्षदर्शीतय् कथं म्हिगः सुकुलध्वाखाय् भैलःखः हःगु इलय् छम्ह ल्याय्म्हं अप्पां कयेकेगु शुरु यायेवं प्रहरी व मेपिं मनूत जानाः वयात दाये फक्व दाया छ्वःगु खः ।

आः गुथि संस्थानं बजेट फ्यानाः रथया मर्मत यानाःलि रथयात गाःहितिइ थातय् लाके धुंकाःलि हे तिनि बली पूजा यानाः बिस्काःया मेमेगु जात्रा न्ह्याकीगु जूगु दु। अथे जुयाः गुथि संस्थानं माःकथं भैलःखः स्यंल्ह्वं याइपिं मनूत मालाच्वंगु दु। नकिंजु खः धाःसा गाःहितिइ थातय् लाकातये धुंकूगु दु। भैलःखः जात्रा दिनाच्वंगुलिं उकी दुने च्वंम्ह भैलःद्यः नं आः तक लिमकासे खतय् तुं तयातःगु दनि। गाःहितिइ थातय् लाकेधुंकाः जक भैलःद्यःयात च्यान्हु तक लाकोलाछेँ त्वालय् तयाः भुइफसि ब्वया तइगु चलन दु। म्हिगःनिसें भुइफसि छगः जक लाकोलाछेँय् ब्वयातःगु दु। ख्वपय् बिस्काः जात्रा च्याचा व गुन्हु तक न्ह्याइ ।