नेवाः जागरण मञ्चं दुजः पौ लःल्हात
येँ (सन्ध्या टाइम्स)/नेवाः जागरण मञ्चं म्हिगः छगू ज्याझ्वः यासें स्वक्वःखुसी थः कार्यकर्तातय्त दुजः पौ इन। मञ्चया संयोजक सुजीव बज्राचार्यया सभापतित्वय् जूगु उगु ज्याझ्वलय् नेवाः न्ह्यलुवा व सल्लाहकार लक्ष्मण राजवंशीं मूपाहांया थासं मञ्चया थीथी कवः व कचाय् दुथ्यानाच्वंपिं ५० म्हसित दुजःपौ लःल्हानादीगु खः ।
ज्याझ्वलय् न्ववासें संयोजक सुजीव बज्राचार्यं नेवाः जागरणय् दुथ्यायेगुया अर्थ नेवाः चिन्तन तयेगु नं खः धासें नेवाः चिन्तन तयेफत धायेव नेवाःतय्त नेपालय् गुगु थासय् लाका तल धकाः थुइका काये फइ धयादिल। मूपाहां लक्ष्मण राजवंशीं नेपाःया राजनीतिइ आपालं बेढंगया ज्याखँ जुयाच्वंगु दु धासें उकिया बारे सचेत जुइमाःगु खँ कनादिल। दुजःपौ लःल्हाना कयादीपिंपाखें बालकृष्ण खड्गीं दुजःपौ लःल्हाना कयाः थःपिंत जिम्मेवारी लःल्हाना कया थें वाःचाःगु खँ कनादिल ।
