सुनसरी व मोरङय् खम्बुवानया बम

येँ (सन्ध्या टाइम्स)/थौं सुथय् सुनसरीया इटहरीइ च्वंगु कोशी अञ्चल यातायातया ज्याकुथी बम मुइका बिउगु दु।
उगु ज्याकूया महत्वपूर्ण भ्वं तयातःगु १० नम्बर क्वथाया पिने सुथय् ३ बजेपाखे प्रेसर कुकर बम मुइकूगु खः। बम मूगु थासय् खम्बुवान मुक्ति मोर्चा संयुक्तया पर्चा लुयावःगु दु। उगु पर्चाय् खम्बुवान राज्य प्राप्तिया निंतिं धकाः च्वयातःगु दु। बम विस्फोटनं मानवीय क्षति मजू धाःगु दु। अथे हे थौं सुथय् हे खम्बुवान मुक्ति मोर्चा संयुक्तपाखें मोरङय् नं बम मुइका बिउगु दु। बेलबारीया मालपोतया ज्याकुथी मोर्चाया कार्यकर्तातय्सं अथे बम मुइका बिउगु खः ।

बम मुयाः अनया ज्याकुथी सामान्य क्षति जूगु दु धकाः प्रहरीं धाःगु दु। मोरङया प्रहरीं नं खम्बुवान मुक्ति मोर्चा संयुक्तया पर्चा बम विस्फोट जूगु थासय् लुयावःगु दु धकाः जानकारी बिउगु दु ।