छवाःया प्रव्रज्या क्वचाल
येँ (सन्ध्या टाइम्स)/आनन्द भुवन विहारय् बुद्ध शिक्षा समितिया ग्वसालय् वंगु शनिवाः छगू ज्याझ्वःया दथुइ अल्पकालीन दुर्लभ प्रव्रज्या विधिपूर्वक क्वचाल। ग्राहस्थ जीवन त्वःताः बुद्ध धर्मया नियमकथं शील पालना याये धकाः वःपिं झिंनिदँनिसें झिंन्यादँ तकयापिं भन्तेतय्गु निंतिं ग्वसाः ग्वःगु उगु ज्याझ्वलय् मुक्कं झिंन्याम्हेसिनं ब्वति काःगु खः। भिक्षु श्रामणेशर महास्थवीर मू पाहां कथं बिज्याःगु उगु ज्याझ्वलय् ब्वति काःपिं श्रामणेरपिंमध्ये मुक्कं न्याम्हेसित उत्कृष्ट कथं ल्यज्या यानाः सिरपाः लःल्हायेगु ज्या नं जूगु खः ।
ज्याझ्वलय् मेघंकर, शरणंकर, मंगल, सोभित व पियदस्सीपिं सिरपाः त्याकेत ताःलाःगु खः। उगु प्रव्रज्या ज्याझ्वलय् थीथीकथं ग्वाहालि यानादीपिंत नं ज्याझ्वःया दथुइ हे हनेज्या नं जूगु खः ।
आनन्द भुवन विहारया प्रमुख भिक्षु संघरक्षित स्थवीरया अध्यक्षताय् जूगु उगु ज्याझ्वलय् ग्वसाः खलःया कोषाध्यक्ष रोशनी तुलाधरं ज्याझ्वलय् जूगु खर्चया बारे जानकारी बियादीगु खः। अथे हे विपश्यना ध्यान गुरु महेन्द्रमुनि बज्राचार्य, समितिया छ्याञ्जे अम्बिकालक्ष्मी तुलाधर, दुजःपिं रोशनी तुलाधर, सुनिता तुलाधर व राजेश बज्राचार्यपिंसं ज्याझ्वःया थीथी पक्षयात कयाः कुलादीगु खः। अथे हे ज्याझ्वलय् ब्वति काःपिं श्रामणेर शरणंकर व मंगलपिंसं नं बिचाः प्वंकादीगु खः ।
वंगु चैत्र २० गतेनिसें हे न्ह्याःगु उगु प्रव्रज्याय् छवाःया दुने बुद्ध धर्मलिसे स्वापू दुगु थीथी पक्ष बारे जानकारी बीगु लिसें आनापान ध्यान भावनाया अभ्यास व स्वयम्भु, बौद्ध व कपन लागाया भ्रमण नं याकूगु खः। समितिपाखें बुद्ध धर्म प्रचारया झ्वलय् थीथी ज्याझ्वः याना वयाच्वंगु दु ।
