नेवाः व ताम्सालीङ्या मंकाः ग्वसालय् बैशाख १४ गते बन्द

संविधानसभाया निंतिं तंगु दछिया म्याद सिधयेत आः ५० दिं नं ल्यं मंत, आःतकं न्हूगु संविधानया मस्यौदा तकं दयेकूगु मदुनि, अखण्डित ताम्सालीङ व अखण्डित नेवाः स्वायत्त प्रदेशया संवैधानिक ग्यारेन्टी जूगु मदुनि। अथे हे आदिवासी जनजाति आन्दोलन, झिंनिदँ ताःहाकःगु जनयुद्ध, ०६२/ ०६३ या जनआन्दोलन व मधेस आन्दोलनपाखें अनुमोदित व जनताया ताःहाकःगु संघर्ष, त्याग व बलिदानं प्राप्त जूगु संघीयता, लोकतान्त्रिक गणतन्त्र व धर्मनिरपेक्षता थेंजाःगु नेपाली जनताया ऐतिहासिक व महान् उपलब्धित छखे संस्थागत जूगु मदुनि धाःसा मेखे आः संक्षिप्त संविधान वा असहमत विषयवस्तुया नामय् उत्पीडित आदिवासी जनजाति नापं वर्ग, जाति/समुदाय, मिसा, आदिया हक, अधिकार कुण्ठित यायेत एकात्मकवादी, यथास्थितिवादी, संघीयता विरोधी तत्वतय्सं जातीय संघीयता, लोकतान्त्रिक गणतन्त्र व धर्म निरपेक्षतायात संस्थागत जुइ मबीकेत थीथी भ्रम ब्वलंकेगु व खुल्लम खुल्ला संविधान मदयेकेगु, जनादेश विरुद्ध संविधानसभाया म्याद जक तनेगु, संविधानसभाया म्याद सिधये त्ययेकाः राज्य पुनर्संरचना आयोग दयेकेमाःगु माग यानाः देशयात संविधानविहीन रुपं न्ह्याबलें संक्रमणकालीन स्थितिइ तया तयेगु चलखेल व षडयन्त्र जुयाच्वंगु स्थितिप्रति ताम्सालीङ संयुक्त संघर्ष समिति व नेवाः स्वायत्त राज्य मंका संघर्ष समितिया गम्भीर रुपं ध्यान वंगु दु। अथे जुयाः २०६७ फागुन १४ गते ताम्सालीङ संयुक्त संघर्ष समिति व नेवाः स्वायत्त राज्य मंकाः संघर्ष समिति दथुइ जूगु सहमति प्रति हाकनं प्रतिबद्धता प्वंकुसें आत्मनिर्णयया अधिकारनापं अखण्डित ताम्सालीङ व अखण्डित नेवाः स्वायत्त गणराज्य (प्रदेश) या संवैधानिक सुनिश्चितता, आदिवासी जनजातिया हक, अधिकार व राजनीतिक अग्राधिकारया ग्यारेन्टी, संघीयता, लोकतान्त्रिक गणतन्त्र व धर्म निरपेक्षताया संस्थागत विकास व सुदृढीकरणया नापं शान्ति व न्हूगु संविधान प्राप्त यायेगु निंतिं आन्दोलनया विकल्प मखंगुलिं क्वय् बिया कथंया सहमति नापं मंकाः आन्दोलनया ज्याझ्वः घोषणा यानागु दु:-

मागत:
१) २०६८ जेष्ठ १४ गते दुने अखण्डित ताम्सालीङ व अखण्डित नेवाः स्वायत्त प्रदेश सहित धर्मनिरपेक्षता, जातीय स्वायत्तता, संघीयता, लोकतन्त्र व गणतन्त्रयुक्त आदिवासी जनजाति मैत्री संविधान जारी या ।

२) छुं नं त्वहःचिनाः संक्षिप्त व पूवमंगु संविधान जारी यायेगु षडयन्त्र बन्द या। फ्यानातःगु इलय् हे पूवंगु संविधान जारी या ।

३) आत्मनिर्णयया अधिकार व राजनैतिक अग्राधिकारनापं अखण्डित ताम्सालीङ व अखण्डित नेवाः स्वायत्त गणराज्य (प्रदेश)या संवैधानिक ग्यारेन्टी या ।

४) आदिवासी जातियात आत्मनिर्णय, स्वशासन, स्वायत्तता व राजनैतिक अग्राधिकार प्राप्त यायेगु व इमित लिच्वः लाइगु कानून व नीति दयेकेबलय् इमिगु स्वतन्त्र पूर्व सु-सूचित अधिकार प्राप्तिया ग्यारेन्टी या ।

५) आदिवासी जातिया प्रथाजन्य कानून, न्यायिक प्रणाली संचालन यायेगु संस्थायात म्हसीकेगु, संस्कृति, धर्म सामाजिक व्यवस्था, प्राकृतिक स्रोत-साधनलिसे स्वानाच्वंगु विषयय् स्थानीय अदालत सरहया अदालत गठनया व्यवस्था या ।

६) छुं नं सरकारया क्षेत्राधिकार दुने मलाःगु राजनैतिक व आर्थिक अवशिष्ट अधिकारत प्रादेशिक सरकारय् निहित जुइगु व संघीय सरकारया स्वीकृति कयाः प्रादेशिक सरकारं वैदेशिक सहायता व त्यासा काये फइगु, वाणिज्य व लगानी सन्धि सम्झौता याये फइगु अधिकार सुनिश्चित या ।

७) प्रादेशिक भाषायात केन्द्रीय सरकारया ज्याखँया भाषाया रुपय् मान्यता बिउ ।

८) छगू प्रतिशत स्वयां अप्वः जनसंख्या दुगु आदिवासी जनजातितय्गु लागि जातिया आधारय् स्वायत्त प्रदेश व व स्वयां म्हो जनसंख्या दुगु हकय् विशेष संरचना दयेकि ।

९) जातीय स्वशासन/स्वायत्त प्रदेश निर्माण यायेबलय् आदिवासी जाति व समुदायया ऐतिहासिक आदिभूमिया भौगोलिक अखण्डतायात सम्मान यायेमाः। आदिवासी जातिया ऐतिहासिक आदिभूमियात खण्डित जुइकथं दयेकीगु क्षेत्रीय वा भौगोलिक नापं छुं नं कथंया प्रदेश संरचना दयेकेगु ज्या दिकि ।

१०) संविधानसभाया विषयगत समितिपाखें संविधानया मस्यौदात प्रस्ताव जुइधुंकूगु व संविधानसभाया म्याद सिधयेत्यंगु स्थितिइ राज्य पुनर्संरचना आयोग गठनया खँ औचित्यहीन, अनावश्यक व संविधान मदयेकेगुपाखे न्ह्याःवंगु दु। अथे जुयाः च्वय् न्ह्यथनागु आधारत संविधानसभा राज्यया पुनर्संरचना व राज्यशक्तिया बाँडफाँड समितिया संघीयता लगायत राज्य पुनर्संरचनाया १४ प्रदेश व राज्यशक्ति बाँडफाँडया प्रस्तावयात संशोधन यायेमाः ।

संघर्ष समिति गठन:
उगु उद्देश्य पूवंकेगु निंतिं आन्दोलनया ज्याझ्वः यायेगु व संचालन यायेत ताम्सालीङ संयुक्त संघर्ष समिति व नेवाः स्वायत्त राज्य मंकाः संघर्ष समितिया फुक्क घटकपाखें छम्ह/छम्ह प्रतिनिधि जुइ कथं नेवाः ताम्सालीङ संयुक्त संघर्ष समिति गठन जूगु दु। थ्व समितिपाखें संचालन जुइगु संघर्षया स्वरुप शान्तिपूर्ण जुइ ।

आन्दोलनया ज्याझ्वः:
ताम्सालीङ संयुक्त संघर्ष समितिया पूर्व निर्धारित २०६७ चैत्र ३० गतेया ताम्सालीङ बन्दया ज्याझ्वःया सम्बन्धय् नेवाः स्वायत्त राज्य मंकाः संघर्ष समितिं संयुक्त रुपं आन्दोलन यायेगु लागि इनाप याः कथं ज्याझ्वःया स्वरुप हिलाः निम्न कथं ज्याझ्वः तःगु दु:-
क) २०६८ बैसाख १४ गते अखण्डित नेवाः लगायत अखण्डित ताम्सालिङ स्वायत्त प्रदेश मंकाः रुपं बन्द यायेगु ।

ख) ताम्सालीङ संयुक्त संघर्ष समितिया पूर्व निर्धारित २०६७ चैत्र ३० गतेया ज्याझ्वःया स्वरुप हिलाः ताम्सालीङया फुक्क सदरमुकाम व मू मू थाय्, शहरय् आमसभा यायेगु ।

ग) २०६८ बैशाख १३ गते बहनी ६.०० बजे मसाल जुलुस यायेगु ।

घ) उगु मंकाः आन्दोलन बारे सर्वसाधारणयात जानकारी बीत २०६७ चैत्र २६ गते मंकाः प्रेस सम्मेलन यायेगु (म्हीग जूगु) ।

ङ) माःकथं मेगु थप ज्याझ्वः कथहं घोषणा याना यंकेगु।
अन्तय्, अखण्डित ताम्सालीङ व अखण्डित नेवाः स्वायत्त प्रदेशनापं धर्म निरपेक्षता, आत्मनिर्णय, राजनैतिक अग्राधिकार, अवशिष्ट राजनैतिक व आर्थिक अधिकार, जातीय स्वायत्तता, संघीयता, लोकतन्त्र, गणतन्त्र व भौगोलिक अखण्डता व स्वाधिनतायुक्त आदिवासी जाति मैत्री संविधान जारी यायेगु उद्देश्य ज्वनाः यायेगु आन्दोलनया ज्याझ्वःयात प्रचार प्रसार यानाः सर्वसाधारण फुक्कसित सन्देश सम्प्रेषण यानाः ग्वाहालि यानादीत सकसितं इनाप यायेगु जुइ ।

ताम्सालीङ संयुक्त संघर्ष समिति पाखें : संयोजक परशुराम तामाङ
नेवाः स्वायत्त राज्य मंकाः संघर्ष समितिपाखें : अध्यक्ष, राजभाइ जकःमि

More Stories Like this