उद्योग वाणिज्य महासंघया साधारणसभा सुरु
नेपाःया उद्योगी व्यवसायीतय् मंकाः संगठन नेपाल उद्योग वाणिज्य महासंघया ४५क्वःगु साधारणसभा थनिंनिसें येँय् सुरु जूगु दु ।
येँया याक एण्ड यति होटय् जूगु छगू ज्याझ्वःया दथुइ प्रधानमन्त्री झलनाथ खनालं साधारणसभाया उलेज्या यानादीगु दु । साधारणसभां ६१दुजः दुगु न्हूगु कार्यसमिति ल्यइगु ज्याझ्वः दु ।
महासंघया न्हूगु नेतृत्वया निंतिं सुरज वैद्य व आजाद श्रेष्ठं उम्मेदवारी बिउगु दुसाः निम्हं उम्मेदवारतय्सं कार्यसमितिया निंतिं थःथःगु प्यानलया घोषणा याःगु दु ।
वैद्यया पाखें न्वकु पदया निंतिं भाष्कर राजकर्णिकार, किरण साखः, पशुपति मुराका व भवनी राणां उम्मेदवारी बिउगु दुसाः श्रेष्ठया प्यानलं कृष्णप्रसाद ताम्राकार, प्रदिपजंग पाण्डे, प्रदिपमान वैद्य व निरक केसीं उम्मेदवारी बिउगु दु । मंगलवाः जुइगु निर्वाचनं मेगू स्वदँया निंतिं महासंघया न्हूगु नेतृत्व सहित न्हूगु कार्यसमिति ल्यइ ।
साधारणसभाया उलेज्या यानादिसें प्रधानमन्त्री खनालं नक्कली भ्याट बिल दयेकाः राजस्व ठगी याइपिंत सरकारं कडा कारवाही यायेगु धयादिल । वय्कलं शान्ति प्रक्रिया व संविधान जारी लिपा अद्यौगिक क्रान्ति जुइगु दावी नं यानादिल ।
अथेहे ज्याझ्वःलय् महासंघया अध्यक्ष कुशकुमार जोशीं उद्योग व व्यवसाय क्षेत्रयात राजनीतिक दलया नेतातय्सं राजनीतिकरण याःगु धासें कुंखिनादिल । वय्कलं थज्याःगु समस्या समाधान यायेत नेतातय्सं इच्छा मक्यंगुलिं नेपा:या उद्योग धराशायी जूगु धयादिल ।
ज्याझ्वलय् देय्या थीथी जिल्ला व देशं पिनेया ६०० मल्याक प्रतिनिधितय्सं ब्वति कयाच्वंगु दु ।
News Location:
