नेविसंघ बारे कांग्रेसय् विवाद
नेपाल विद्यार्थी संघया विषययात कयाः नेपाली कांग्रेस केन्द्रीय समितिया मुँज्याय् विवाद जूगु दु ।
नेविसंघया अध्यक्ष प्रदीप पौडेलं वंगु चैत १९ गते बिउगु राजीनामायात षड्यन्त्रमूलक धकाः विद्यार्थीतय्सं आपत्ति प्वंकाच्वंगु इलय् कांग्रेस केन्द्रीय समिति दुने नं थुगु विषय विवाद तच्वःगु खः ।
पौडेलं राजीनामा बिइधुंकाः नेविसंघया महाधिवेशन यायेत कांग्रेस सभापति सुशील कोइरालां महामन्त्री प्रकाशमान सिंहया संयोजकत्वय् आइवताः स्वम्ह दुजः दुगु समिति नीस्वंगु खः । उगु समिति नीस्वंगु प्रति असहमति प्वंकूसें कांग्रेस नेता शेरबहादुर पक्षधरं सोमवाःया मुँज्या बहिष्कार यात । मुँज्याय् देउवा पक्षधरतय्सं वर्तमान कार्यसमितियात हे महाधिवेशनया जिम्मा बिइमाःगु धाःगु दु ।
उखे नेविसंघया विद्यार्थीतय्सं नं कांग्रेस सभापति कोइराला व संसदीय दलया नेता रामचन्द्र पौडेल प्रति असन्तुष्टि प्वंकूगु दु । इमिसं आइतवाः कांग्रेस पार्टी ज्याकू घेराउ तकं याःगु खः ।
