जेठ १३ गते नेवाः व ताम्सालिङ प्रदेशय् मसाल जुलुस
येँ (सन्ध्या टाइम्स)/नेवाः ताम्सालिङ संयुक्त संघर्ष समितिपाखें घोषणा याःगु जेठ १४ गते नेवाः व ताम्सालिङ प्रदेश बन्द ज्याझ्वः ताःलाकेत जेठ १३ गते मंकाः कथं थाय्थासय् मसाल जुलुस पिकाइगु जूगु दु
।
नेवाः ताम्सालिङ संयुक्त संघर्ष समितिपाखें संघीय गणतान्त्रिक नेपाः दुने नेवाः व ताम्सालिङ स्वायत्त राज्य सुनिश्चित यायेमाःगु नापं झिगू सूत्रीय माग तयाः बन्द ज्याझ्वः यायेत्यनागु जानकारी बिउगु दु ।
म्हिगः येँय् छगू पत्रकार सम्मेलन यानाः इना बिउगु प्रेस विज्ञप्तिइ वइगु चैत्र ३० गते तामाङतय्सं न्हापा हे बन्द घोषणा यानातये धुंकूगु जुयाः उकुन्हुया ज्याझ्वः हीकाः थाय्थासय् जनसभा यायेगु खँ न्ह्यथनातःगु दु ।
ताम्सालिङ संयुक्त संघर्ष समितिपाखें परशुराम तामाङ व नेवाः स्वायत्त राज्य मंकाः संघर्ष समितिपाखें राजभाई जकःमिं ल्हाःचिं तयातःगु उगु विज्ञप्तिइ बन्द ज्याझ्वः ताःलाकेगु नितिं थप संघर्षया ज्याझ्वः मंकाः कथं नापनापं व ब्यागलं ब्यागलं कथं नं यायेगु जुइगु खँ धाःगु दु ।
