कडा सुरक्षाया दथुइ बिस्काः जात्रा

ख्वप (सन्ध्या टाइम्स)/च्याचा व गुन्हु तक न्ह्याइगु ख्वपया बिस्काः जात्रा थौं आइतवाःनिसें शुरु जुल। बिस्काःया थौं न्हापांगु न्हि टौमढीया भैलःद्यः कुहां बिज्याकाः भैलः खतय् बेताःद्यः बिराजमान यायेवं थःने क्वःने भैलःखः सालाः जात्रा न्ह्याइ। वइगु बैशाख १ गते सनिलय् अन थनातःम्ह यःसिं क्वःथलेवं बिस्काःजात्राया नखत्यालिसें स्थानीय जात्रात न्ह्याइ। थ्व झ्वलय् २ गते ब्रम्हायणी जात्रा, ३ गते महालक्ष्मी जात्रा व ४ गते द्यः सगं बीकुन्हु छुमाः गणेद्यःया जात्रा न्ह्याइ। यःसिं थनेधुंकाः बहनी बाराहीया तिंप्वाः जात्रा यानाः द्यः ख्यलय् यंकी। जात्राय् ख्वपय् सुरक्षा व्यवस्था कडा याःगु दु। उच्छृंखल गतिविधि मजुइकेत ख्वपया प्रहरी परिसरं सादा पोशाकया प्रहरी नं परिचालन याःगु दु। अथेहे भैलःखः सालीगु मू लँया थाय्थासय् सीसीटिभी तयेगु लिसें मोबाइल गस्ती व उद्धार टोली नं परिचालन यानागु खँ प्रहरी निरीक्षक राजेन्द्र श्रेष्ठं 'सन्ध्या टाइम्स'यात कनादिल ।