माओवादीं सरकार गठनया प्रकृया न्ह्याकल
एकीकृत नेकपा (माओवादीं) थःगु नेतृत्वय् न्हूगु सरकार गठन यायेगु निंतिं थीथी दलत नाप परामर्श याःगु दु ।
कांग्रेस व एमालेया गठबन्धनं एमाले नेता माधवकुमार नेपालया नेतृत्वय् न्हूगु सरकार देयेकेगु कुतः यानाच्वंगु ईलय् माओवादीं थ्व पलाः न्ह्याकूगु खः ।
थ्वहे झ्वलय् मंगलवाः सुथय् प्रधानमन्त्री निवास बालवाटारय् माओवादीं मधेशी मार्चाया स्वंगुलिं दलत नाप सहलह याःगु दु । सहलहलय् माओवादीं कांग्रेस व एमाले स्वयां माओवादी मधेशीतय् मागय् स्पष्ट जूगु धासें परिवर्तनकारी शक्तित छप्पँ जुइत व माओवादी नेतृत्वया न्हूगु सरकारयात ग्वहालि यायेत इनाप याःगु खः । अथेहे माओवादीं राष्ट्रपतिं ल्ह्वंगु पलाःया विरोध यायेत नं मधेशवादी दलतय्त इनाप याःगु दु ।
मधेशी जनअधिकार फोरम, तराई-मधेश लोकतान्त्रिक पार्टी व सद्भावना पार्टी दुथ्याःगु उगु खँल्हाबंलाय् मधेशी दलतय्सं माओवादीयात जिम्मेवार ढंग न्हूगु सरकार गठन प्रकृयाय् न्ह्या वनेत इनाप यासें संसद अवरुद्ध मयायेत सुझाव ब्यूगु खः ।
थ्वहे झ्वलय् म्हिग माओवादीं न्यागू चीधंगू दलत नाप सहलह याःगु दु । सिंहदरवारय् च्वंगु माओवादी संसदीय दलया ज्याकूथीइ च्वंगु बैठकय् न्यागू चीधंगू दलं माओवादी नेतृत्वया न्हूगु सरकार यात ग्वहालि यायेगु सहमति प्वंकूगु खः ।
सोमवाः जूगु खँल्हाबंलाय् नेकपा संयुक्त, नेकपा एकीकृत, नेपाली जनता दल व संयुक्त लोकतान्त्रिक मंचं ब्वति काःगु खसाः सद्भावना आनन्दीदेवी फोन यानाः सहमति प्वंकूगु खः ।
माओवादीं थौं नं थ्व न्यागू दलत नाप सहलह यायेगु ग्वसाःग्वयातःगु दु ।
