सिक्किमय् नेपाः महोत्सवया तयारी

सिक्किमया आदिवासी परिवारपाखें मन्दिरा लेप्चा, वया केहेँ छेसम लेप्चा, नमिता लिम्बुं जब नेवाः संस्कृतिइ आधारित चर्या नृत्य कुमारी व धिमे प्याखं न्ह्यब्वल, उमित गैर नेवाः खः धकाः सुनां धाये तकं मफुत। स्वयेबलय् उपिं किराँत नश्लया नेवाः नृत्यांगना थें च्वं। गबलय् थ्व नृत्यांगनातय्गु नां मञ्चय् संवोधन यात, सहभागी नृत्यांगना ल्यासेत अप्वः थें गैर नेवाः खनेवं फुक्कं अजू चाल। सिक्किम नेवाः गुथि मल्लीडाँडापाखें प्रशिक्षण क्वचाःगु सभाय् हुलाप्याखं क्यंपिं मध्ये दिपा राई, दिपा मगर, निर्मला क्षेत्री, विना राई लगायतया प्याखंम्वःत गैर नेवाः खः। नृत्य गायनय् सहभागी मजूपिं ल्याय्म्ह ल्यासेत नं दक्षिण सिक्किमया मनु क्षेत्रीं हाकुपतासि व भान्तांलं फिनाः ब्वति काःगु खः ।

नेवाः थः हे जात मखु, नेवाः राष्ट्रियता दुने किराँती नश्ल यलम्बर वंशया ज्यापु, अन्तिम किराँती जुजु गास्ती वंशया गथु (माली), राई लिम्बुलिसें इहिपा चले याइपिं व्यञ्जनकारलिसें कयाः जनकपुरया नश्लगत स्वापू दुपिं रजक, कनौजिया, मघैया थरया मैथिल नेवाः तकं दु। नश्ल उदाय (तुलाधर, सिन्दुराकार, शिख्राकार, शिलालिक, स्थापित, ताम्राकार) निसें कनौजिया मधेशी ब्राम्हण राजकर्णिकार तकं दु। नेवाः समुदायय् भगवान बुद्धया थारू वंशीय शाक्य, कोलियपाखें कौशल खुसल जुयाः खुसः जू वःपिं तण्डुकार तकं दु। सेसान्त लागा वर्तमानय् ताम्सालिङ लागाया बासिन्दा लिपा पाटलीपुत्र पटनापाखें वःपिं लिच्छबि, मल्लपुरीया मल्ल हाल श्रेष्ठ स्यस्यः नेवाः पहिचानय् समाहित जुयाच्वंगु दुसा सीम्ह थुनिगु संस्कार दुपिं नाथ सम्प्रदाय कुश्ले, कपाली, देवस्थल पाःलाः, पोडे, अष्टमातृका देवीया वंशज च्याम्हखलःनिसें सिम्रौनगढ बाराय् राज्य चले याःपिं नान्यदेवया वंशज हरिसिहंदेवलिसें नेपालमण्डल (स्वनिगः) दुहां वःपिं खड्गी शाहीतय्त नेवाः कथं म्हसीकातःगु दु। खस ठकुरी जुजुया वंशज नं नेवाः समाजया थकू जुजुया पहिचानय् दुगु इलय् सिक्किम व दार्जिलिङय् थ्यंपिं नेवाःत धाःसा प्रधान थरया म्हसीकाय् समाहित जुयाच्वंगु दु ।

उगु हे तथ्यगत आधारयात थुइकं वा मथुइकं सिक्किमेली नेवाःतय्सं थीथी नश्लया ल्याय्म्ह ल्यासेतय्त सफलतापूर्वक छगू हे मञ्चय् हयेफत। विविधता दुथुया एकतायात नेपाल दुने बैदिक ब्राम्हण शर्मा, राज्योपाध्याय, रिमाल, बौद्ध बज्राचार्य गुरुजु, क्रिश्चियन नेवाः भाजु व मुश्लिम नेवाः अमिन तुल्लाह, बहाई ब्रम्हकुमारी, साइबाबा, मनोक्रान्ति लगायत थीथी धर्म धर्माबलम्बीयात छगू हे नेवाः राज्य दुने समाहित याः थें सिक्किमेली नेवाः समुदायं थ्व फुक्कं विविधतायात प्रधान पहिचानय् न्ह्यःने यंकूगु दु सांस्कृतिक ज्याझ्वःया माध्यमं। गुगु सत्यतायात पवन चाम्लिङया नेतृत्वय् दुगु सिक्किम डेमोक्रेटिक फ्रन्ट सरकारं कला उत्थान अभियान मार्फत् साथ बियातःगु दु। राजधानी येँया मध्यपुर थिमिपाखें कलायोगी गणेशराम लाछिलिसें सिक्किम थ्यंकादीम्ह नृत्यगुरु बालमुकुन्द प्रजापति, बाद्यबादन गुरु कुलचन्द्र मानन्धर व सिक्किम निबासी विकेन प्रधान लगायतया नेतृत्वय् मञ्चन याःगु फुक्कं नेवाः सांस्कृतिक ज्याझ्वः सिक्किमया इतिहासय् हे न्हापांगु खः धाःगु दु। थ्वहे अप्रिल महिनाय् जुइगु सिक्किम नेवाः महोत्सवया तयारी स्वरुप जूगु उगु सांस्कृतिक ज्याझ्वलय् दंपिं कलाकारतय्सं न्ह्यब्वःगु लाखे प्याखं थीथी कथंया आधुनिक नेपालभाषाया हुलाप्याखनं धायेफु थ्व न्हापांगु न्ह्यब्वया ला ख हे मखु ।

गुदँ दुम्ह मचानिसें २२ दँया ल्याय्म्ह ल्यासे तकया सहभागिता दुगु थुगु सांस्कृतिक ज्याझ्वःयात सिक्किमेली नेवाः सांस्कृतिक थां कथं उत्थान यायेगु सहभागीतय्सं मत व्यक्त याःगु दु। कला योगी गणेशराम लाछिं धयादिल- 'नेवाः कलायात निख्खार यायेत जि मध्यपुरया थःगु छेँय् प्याखंम्वःतय्त थप तालिमया लागिं घ्वानाच्वनागु दु ।'

More Stories Like this