पार्किङ्गया समस्या व सूचनाया हक

रश्मी नापित

सन् २०११ यात पर्यटन वर्ष घोषणा याये धुंकाः हरेक क्षेत्रं पर्यटक दुकायेगु कुतः जुयाच्वंगु दु। खय्त ला पर्यटकीय दृष्टिकोणं सकसिगु मिखाय् लानाच्वंगु देय् खयां नं थीथी समस्यां यानाः वयेगु इच्छा दुपिं पर्यटकत नं नेपाः मवयाच्वंगु अवस्था दु। देशय् ब्वलनाच्वंगु तःधंगु समस्या ला तःधंगु हे जुल, पार्किङ्ग थेंज्याःगु समस्या तक नं राज्यं समाधान याये फयाच्वंगु मदु, गुकिया लिच्वः पर्यटन व्यवसायय् समेत लानाच्वंगु दु। थ्व अव्यवस्थित पार्किङ्गया कारणं न्हिंन्हिं लँय् जुइपिं लँजुवाःतय्त तकं सास्ति जुयाच्वंगु दु। थ्वहे खँयात वाःचायेकाः जुइ थौंकन्हय् पार्किङ्ग व्यवस्थाय् कडाई याना हःगु दु। पार्किङ्ग व्यवस्था सुधार यायेगु कुतः यानाच्वंगु महानगरीय ट्राफिक प्रहरी कार्यालयया एस.पी. जगतमान श्रेष्ठं पार्किङ्ग समस्या समाधान यायेत सर्वसाधारण नागरिक नं सचेत जुइमाःगु खँ कनादीगु दु ।

थ्व कडाईयात ट्राफिकं धाःसा न्हूगु नियम लागू यानागु मखुसें पुलांगु हे नियमयात कडा यानाः लागू यानागु जक खः धायेगु याः। अप्वः मात्राय् दुर्घटना जुइगु पुलांगु पार्किङ्ग लागाय् पार्किङ्ग प्रतिबन्ध यानागु जानकारी नं एसपी श्रेष्ठं कनादिल। वय्कःया धापूकथं न्हापाया तुलनाय् थौंकन्हय् म्हो जक दुर्घटना जू। मनूतय्सं थुगु कडा पार्किङ्ग व्यवस्थाया कारणं ताः ई ट्राफिक जाम जूगु अनुभव याःगु जूसां न्हापा स्वयां आः मनूत लँय् जुइत अःपु धाःगु प्रतिक्रिया नं थःथाय् वयाच्वंगु खँ वय्कलं कनादिल। थःपिंसं लागू यानागु नियमया पालना मयाःपिंत नीन्यातकांनिसें नीन्याद्वःतक बं पुइकाच्वनागु खँ नं वय्कलं कनादीगु दु ।

पार्किङ्गया कडा नियम लागू यायेगु झ्वलय् थःपिंसं न्हापांगु छुं दिं मनूतय्त ह्ययेकेगु कुतः नं यानागु खँ धासें वय्कलं झीगु थेंज्याःगु देशय् मनूतय्त ह्ययेकेगु मखु ख्यायेगु हे बांलाःगु उपाय जूगु खँ नं कनादिल।
खय्त ला थौंया नीछगूगु शताब्दीइ ट्राफिक प्रणाली नं न्हूगु हे प्रविधिं संचालन जुइमाःगु खः, तर झीगु देशय् धाःसा न्हापाया पुलांगु हे प्रणाली यथावत जुयाच्वंगु दु। थःपिनिपाखें याये फइगु हरेक कुतः थःपिंसं यानाच्वनागु खँ कँसें भाजु श्रेष्ठं अझ गुकथं पार्किङ्ग व्यवस्थालिसें ट्राफिक नियमयात प्रभावकारी ढंगं न्ह्याके फइ धइगु विषयय् अध्ययन यानाच्वनागु जानकारी वय्कलं बियादीगु दु ।

थुथाय् लुमंकेबहःगु मेगु खँ छु धायेबलय् आम मनूतय्सं गन सवारी साधन दिके जिउ व गन मजिउ धइगु खँ बांलाक मसिउ। उकिया जानकारी नं उमिके मदु। तर ट्राफिक प्रहरी विभागया एसपी श्रेष्ठं धाःसा गाडी चले यायेगु निंतिं लाइसेन्स कायेगु इलय् हे ड्राइभिङ्ग लिसे सम्बन्धित सकतां जानकारी कायेगु अनिवार्य जूगु खँ कनादिल। न्ह्यागु हे जूसा ट्राफिक व्यवस्था उचितकथं लागू यायेगु ज्याय् थःगु विभाग क्रियाशील जुयाच्वंगु जानकारी वय्कलं बियादिल ।

थ्व ला जुल सार्वजनिक यातायात साधनया पार्किङ्ग विषयय् ट्राफिक विभागया धापू। तर झीगु देशय् सार्वजनिक स्वयां नं निजी सवारी साधनया संख्या अप्वः दु। क्वथीक स्वयेगु खःसा थन समग्रय् हरेक छेँय् छगः मोटरसाइकल ला अनिवार्य थें दइ दु। अझ भचा सम्पन्न परिवार खःसा ला म्हतिं छगः धइथें हे मोटरसाइकल दइ। थुज्वःगु अवस्थाय् पार्किङ्गया समस्या जुयाच्वंगु नं तःधंगु खँ मखुथें तायेफु। येँ लागायात स्वयेगु खःसा निःशुल्क पार्किङ्ग यायेगु धइगु ला म्हो हे जक थाय् दइ। अझ सशुल्क पार्किङ्ग यायेत नं थाकुगु अवस्था दु। छगू ला ध्यबा पुलाः पार्किङ्ग यायेमाःगु हे मनूतय्गु निंतिं छगू समस्या जुयाच्वंगु दु अले मेगु समस्या धइगु ध्यबा पुलेगु गुलि? थाय् अनुसार भाः पाः। छगू थासय् छता भाः जूसा मेगु थासय् मेगु हे भाः जुयाच्वनी। थुगु समस्या बारे महानगरपालिका महाशाखा प्रमुख नूरनिधि न्यौपानेयाके न्यनाबलय् वय्कलं थःपिंसं फुक्क थासय् छगू हे भाः क्वःछिनातयागु जानकारी बियादिल। थःपिंत जानकारी वःगु थासय् वनाः कारवाही नं यानागु धासें वय्कलं थौं तकया दुने थःपिंसं झिंन्यागू थासय् थुज्वःगु ठगी याःगु लुइके धुनागु धासें उगु लागाय् वनाः कारवाही नं यानागु जानकारी बियादिल। थुथाय् सर्वसाधारणया निंतिं स-शुल्क पार्किङ्ग लागाय् गुलि ईया निंतिं गुलि ध्यबा पुलेमाः धइगु जानकारी बीमाः लाकि म्वाः धइगु न्ह्यसः नं वइ। थुगु विषयय् महाशाखा प्रमुख न्यौपानें स-शुल्क पार्किङ्ग इलाकाय् ई व मू च्वयातःगु बोर्ड थःपिंसं तयातयागु खँ कनादिल। थुकिया लिसें असं थेंज्याःगु थासय् पार्किंगय् च्वनीपिं मनूतय्गु लनय् नं पार्किङ्ग व मू च्वयाः थःपिंसं फुकथं मनूतय्त जानकारी बीगु कुतः यानाच्वनागु खँ नं वय्कलं कनादिल। थुकि यालिसें वय्कलं थःपिंसं स्वदँ न्ह्यः हे पार्किङ्गया विषयय् छगू प्रस्तावना हे तयार यानागु खँ कँसें थौंकन्हय्या अवस्था स्वयेगु खःसा सवारी साधन ब्वाकेगु मखु दिका जक हे तयेगु जूसां नं थनया सडक म्हो जुयाच्वंगु अवस्था बारे ध्यानाकर्षण यासें थुज्वःगु अवस्थाय् पार्किङ्ग व्यवस्था सन्तुलन यायेत थाकुगु खँ कनादिल। थुज्वःगु अवस्थाय् जनसाधारणं हे महत्वपूर्ण भूमिका म्हितेमाःगु खँ नं वय्कलं कनादिल। नगरपालिकां पार्किङ्ग व्यवस्था बारे जनसाधारणयात थुइकेगु कुतः याःगु जूसां नं जनसाधारणं हे थुखेपाखे चिउताः मतःगु नं वय्कःया धापू दु। अथे जूगुलिं राजनैतिक पार्टीं हे थुगु व्यवस्थाया जिम्मेवारी कायेमाःगु खँ वय्कलं कनादिल। निजी सवारी साधन अप्वयाच्वंगु थौंया इलय् पार्किङ्गया समस्या पूवंक न्हंकेगु ला असम्भव हे धाःसां जिउ तर थुसिया वैकल्पिक उपाय धाःसा छ्यले फइगु वय्कःया धापू खः। थुकिया निंतिं राज्यं हे न्हूगु नीति हयेमाःगु नं वय्कःया तर्क दु ।

व्यवस्थित पार्किङ्ग यायेगु निंतिं सार्वजनिक सवारी साधनयात अप्वः प्राथमिकता बीमाःगु खँय् वय्कलं बः बियादीगु दु। थुकिया लिसें सार्वजनिक जग्गायात पार्किङ्ग क्षेत्रया रुपय् छ्यलेगु खःसा नं पार्किङ्गया समस्या अप्वः मात्राय् हल जुइगु विश्वास नं वय्कलं प्वंकादीगु दु। दीर्घकालीन व वैज्ञानिक रुपं थुगु व्यवस्था यायेमाःगु खँ नं वय्कलं बः बियादीगु दु। थःपिनिपाखें कुतः जुयाच्वंगु तर सरकारया ध्यानाकर्षण मजूगु कारणं हे थुगु व्यवस्था न्ह्याके मफुगु द्वपं नं वय्कलं बियादिल ।

यदि पार्किङ्ग भवनया व्यवस्था यायेगु खःसा पार्किङ्ग समस्या बछि कम जुइगु वय्कःया विश्वास दु। थुकिया निंतिं राज्यं निजी क्षेत्रयात सक्रिय यायेमाःगु आवश्यकता वय्कलं खंकादी। अप्वः धइथें सडकय् पार्किङ्ग जुइगु येँया मू मू लागाय् थुज्वःगु पार्किङ्ग भवनया व्यवस्था यायेगु खःसां पार्किङ्ग धइगु समस्याया रुपय् मवइगु खँ वय्कलं कनादी। थुकिया निंतिं राज्यं स्रोत फ्यायेगु व प्रोत्साहित यायेमाःगु आवश्यकता दु ।

सवारी साधन प्रयोग याइपिं मनूतय्सं लँय् गन पार्किंग यायेगु खः मसिउ। अले उपिं वनेगु थासय् पार्किंग यायेगु थाय् नं दइ मखु। मेखे जामया समस्या समाधान यायेत थाय्थासय् वान-वेया व्यवस्था यानातःगु दु। न्ह्याबलें वहे लँय् चले याइपिं बाहेक पिनें वइपिं मनूतय्सं अज्याःगु व्यवस्था सियाच्वनी मखु। थुकिं यानाः नं उपिं अनावश्यक दण्डया भागिदार जुइ मालाच्वंगु दु। सवारी साधन गन पार्किङ्ग यायेगु, गन पार्किङ्ग यायेबलय् गुलि पुलेगु, गुगु गुगु लँय् वने जिउ, गन वने मजिउ धकाः सीकेगु नं सवारी साधन चले याइपिनि अधिकारया खँ खः। गुलिखे मामिलाय् थज्याःगु सूचना मदयाः नं सवारी साधनथुवाःत कारवाहीलय् लानाच्वंगु दु ।

यदि प्रचार प्रसार व प्रयाप्त सूचना प्रवाह जुल धाःसां नं पार्किंग व यातायात अव्यवस्थायात छुं भचा जूसां चीके फइगु खनेदु ।

More Stories Like this