सरकार संचालनया निंतिं कार्यदल गठन
सत्ता साझेदार नेकपा (एमाले) व एनेकपा (माओवादीं) सरकार संचालनया निंतिं च्याम्ह दुजः दुगु कार्यदल गठन याःगु दु । कार्यदलं सरकार संचालनया न्यूनतम मंकाः ज्याझ्वः व सत्ता संचालन सयन्त्रया कार्यविधि तयार याइ ।
प्रधानमन्त्री निवास बालुवाटारय् निगू दलया शीर्ष नेतात दथुइ आइतवाः सुथय् च्वंगु मुँज्याय् कार्यदल गठन याःगु खः । मुँज्या लिपा माओवादी न्वकु नारायणकाजी श्रेष्ठ 'प्रकाशं' निगूलिं दलया प्यम्ह-प्यम्ह दुजः दुगु कार्यदल गठन जूगु धयादिल ।
कार्यदलय् माओवादीपाखें न्वकु प्रकाश, पोष्टबहादुर बोगटी, देव गुरुङ व दिनानाथ शर्मा च्वनादीगु दुसाः एमाले पाखें अर्थमन्त्री भरतमोहन अधिकारी, भीम आचार्य, भीम रावल व सुरेन्द्र पाण्डे च्वनादीगु दु ।
उगु कार्यदलयात मन्त्रीतय् आचार संहिता, राजनीतिक संयन्त्र गठन व उकिया क्षेत्राधिकार क्वःछीगु लगायतया जिम्मा बिउगु दु ।
मुँज्याय् प्रधानमन्त्री झलनाथ खनालं माओवादीपाखें सरकारय् ब्वति काइपिं थप मन्त्रीतय् नां बिइत इनाप याःगु खःसां माओवादी धा:सा गृहमन्त्रालय थःपिंत मबीकं मन्त्रीतय् नां मबिइगु लिसः बिउगु खः ।
News Location:
