माओवादीं देया प्यंगू सहरय् जनसभा याइगु
एकीकृत नेकपा (माओवादीं) सदनया पलेसाः मेगू हे उपाय छ्यलाः सरकार गठन यायेगु कुतः यासाः उकीया सशक्त प्रतिवाद यायेगु निर्णय याःगु दु ।
सोमवाः यलय् च्वंगु पोलिटब्यूरो बैठकं नागरिक सर्वोच्चता कायम मजूतल्ले सतक व सडनपाखें थप संघर्ष यायेगु निर्णय याःगु दु । बैठकं राष्ट्रपतिया पलाः विरुद्ध स्थानीय निकाय तक प्रदर्शन यायेगु खँ माओवादी प्रवक्ता दिनानाथ शर्मा जानकारी बियादिल । वयेकलं विरोधया ज्याझ्व अन्तर्गत जेठ ३ गते देय्या प्रमुख प्यंगू सहर येँ, विराटनगर, नेपालगंज व धनगढीइ विशाल जनसभा याइगु जानकारी बियादिल ।
प्रवक्ता शर्मां थःगु पार्टी सरकार गठनया खँयात उलि महत्व मबीयाःगु धासें नागरिक सर्वोच्चता कायम यायेत शान्तिपूर्ण संघर्ष न्ह्याकातुं च्वनेगु धयादिल ।
बैठकय् पार्टी अध्यक्ष पुष्पकमल दाहाल प्रचण्डं राष्ट्रपतिया पलाः विरुद्ध धुर्वीकरण जुइधुंकूगुलिं थःगु पक्षय् जनमत संकलन यायेत स्थानीयस्तर तक बहस न्ह्याकेमाः धयादीगु शर्मां जानकारी बियादिल ।
