निगू दल दथुइ पूर्ण बजेट हयेगु सहमित
सरकारं बैशाष २० गते पूर्ण बजेट हयेगु धकाः याःगु निर्णय प्रति एनेकपा (माओवादी) सकारात्मक जुइवं सत्ता रुढ नेकपा (एमाले) व माओवादी दथुइ पूर्ण बजेट हयेगु सहमति जूगु दु ।
निगू दलया शीर्ष नेतातय् थौं च्वंगु मुँज्याय् माओवादीं पूरक बजेट हयेगु ई मदुगुलिं पूर्ण बजेट हयेत हे थःपिं सकारात्मक जूगु खँ धाःगु दु । थ्वस्वयां न्ह्यः माओवादीं बजेट हयेगु खँय् एकतर्फी निर्णय याःगु धासें एमालेनाप सहलह यायेगु निर्णय याःगु खः ।
सिंहदरवारस्थित एमाले संसदीय दलया ज्याकूथी च्वंगु निगू दलया मुँज्या लिपा एमाले मुख्य सचेतक भीम आचार्यं थौंया सहलह लिपा माओवादी पूर्ण बजेट हयेत सकारात्मक जूगु धयादिल । वय्कलं माओवादीया नं ज्याझ्वः दुथ्याकाः पूर्ण बजेट हयेगु सहमति जूगु धयादिल ।
अथेहे मुँज्याय् सरकारयात याकनं पूर्णता बिइगु खँय् नं सहमति जूगु दु । तर गृहमन्त्रालयया बारे धाःसा सहमति जुइमफेवं उगु विषयलय् निर्णय यायेगु जिम्मा प्रधानमन्त्री झलनाथ खनाल व माओवादी नायः पुष्पकमल दाहाल 'प्रचण्ड'यात बिउगु दु ।
News Location:
