राष्ट्रपति यादवं सहमतिय आधारय् न्ह्याः वनेत प्रमयात सुझाव
राष्ट्रपति डा. रामवरण यादवं सहमतिय आधारय् न्ह्याः वनेत प्रधानमन्त्री झलनाथ खनालयात सुझाव बियादीगु दु ।
नियमित नापलाय् ज्याया निंतिं शनिवाः सुथय् राष्ट्रपति भवन शितल निवास थ्यंकादीम्ह प्रधानमन्त्रीयात राष्ट्रपति यादवं संविधान जारी यायेगु इलय् कांग्रेस व मधेशवादी दलतय् नं सहमति कायेत इनाप यानादीगु खः । वय्कलं दुई तिहाई बहुमतया आधारय् स्वयां फुक्कं राजनीतिक दलया सहमतिलय् संविधान जारी यायेमाःगु धयादिल ।
प्रधानमन्त्री खनालं संविधान जारी यायेत व वर्तमान सरकारयात नं सहमतिय आधारय् हे पूर्णता बिइगु कुतः जुयाच्वंगु धयादिल । वय्कलं सहमतिय आधारय् न्ह्याः वनेत थीथी राजनीतिक दलत नाप सहलह जुयाच्वंगु नं धयादिल । राष्ट्रपतिनापया सहलह लिपा प्रधानमन्त्री खनालं शान्ति व संविधान निर्माण सहमतिय आधारय् न्ह्याकेगु बारे सहलह जूगु जानकारी बियादिल ।
उगु इलय् प्रधानमन्त्री खनालं सरकारं बैशाषय् बजेट हयेत्यंगु बारे नं राष्ट्रपति यादवयात जानकारी बियादीगु खः ।
