एमालेया पूर्ण बजेटप्रति माओवादीया च्यूताः

एकीकृत नेकपा माओवादीं पूर्ण बजेट हयेगु एमालेया निर्णयप्रति च्यूताः प्वंकूगु दु । प्रचण्ड निवास न्हू बजारय् थौं च्वंगु पदाधिकारी बैठकं सत्ता साझेदारी दल माओवादीलिसे सहलह मयासे पूर्ण बजेट हयेत्यंगु जानकारी ब्यूसें च्यूताः प्वंकूगु खः ।

बैठकलिपा माओवादी न्वकु नारायणकाजी श्रेष्ठ 'प्रकाशं' सञ्चारकःमिपिंलिसे खँल्हानादिसें पूर्ण बजेट हयेगु एमालेया निर्णयप्रति माओवादी असहमत दुगु जानकारी बियादिल । वय्कलं माओवादीया सल्लाह बिना एमालें पूर्ण बजेट हयेत याःगु तयारीया विषयसं कन्हय् माओवादी व एमालेया शीर्ष नेतातदथुइ सहलह जुइगु जानकारी बियादिल ।

एमालेलिसे शीर्ष स्तरय् सहलह क्वःमचानीगुलिं थौं नं माओवादी पदाधिकारी बैठकं सरकारय् ब्वति काइपिं दुजःपिनिगु नां ल्यःगु मदुनि ।