थरुहट व लिम्बुवानपाखें बन्द आह्वान
येँ (सन्ध्या टाइम्स)/थरुहट स्वायत्त परिषद् व संघीय लिम्बुवान राज्य परिषदं थौं ब्यागलं ब्यागलं बन्दया आह्वान याःगुलिं सुथंनिसें हे थरुहट व लिम्बुवान लागाया जनजीवन प्रभावित जूगु दु। थरुहट स्वायत्त परिषदं वर्तमान सरकारय् दुथ्याःगु एकीकृत माओवादी व एमालेपाखें मधेसी जनअधिकार फोरमलिसे मधेस स्वायत्त प्रदेशया नितिं संविधानसभाय् पहल यायेगु धकाः सहमति याःगु विरोध यासें थरुहट स्वायत्त प्रदेशया माग यानाः अथे बन्द आह्वान याःगु खः। थरुहट स्वायत्त परिषदं थनिंनिसें अनिश्चितकालीन हे थरुहट बन्द यायेगु धकाः घोषणा याःगु दु। अथे बन्द आह्वान यानातःगुलिं कोशी, मेची नापं थीथी जिल्लाया राजमार्ग तकं ठप्प जूगु दु। सुनसरीया इटहरी, धरान, झापा नापं थीथी लागाया बजाः तकं बन्द जूगु दु। उगु हे कथं लिम्वुवान स्वायत्त राज्य परिषदं नं क्वःछिनातःगु इलय् हे न्हूगु संविधान जारी यायेमाः धकाः माग यासें थौं लिम्बुवान बन्द आह्वान याःगु खः। अरुण पूर्वया ९ गू जिल्ला बन्द आह्वान याःगुलिं थौं सुथंनिसें हे जनजीवन प्रभावित जूगु दु। लिम्बुवान स्वायत्त प्रदेशया सुनिश्चितताया माग यानाः नं अथे थःपिंसं बन्द आह्वान यानागु खः धकाः परिषदं धाःगु दु ।
