जेष्ठ १४ गते मस्यौदा संविधान पिकायेगु नेतातय् तयारी
येँ (सन्ध्या टाइम्स)/संविधान जारी यायेमाःगु दिं थनिं न्यय्न्हु लिपा वइगु जेष्ठ १४ गते न्हूगु संविधानया मस्यौदा जक सार्वजनिक यानाः हाकनं संविधानसभाया म्याद थप यायेगु तयारी नेतातय्सं यानाच्वंगु दु ।
उकिया नितिं वर्तमान सरकारय् दुथ्याःगु एकीकृत माओवादी, एमाले नापं सरकारयात समर्थन यानाच्वंगु दलतय् दथुइ अनौपचारिक रुपं सहलह तकं जुयाच्वंगु सीदुगु दु। विशेष यानाः आः तकया दुने राज्य पुनर्संरचना व शासकीय स्वरुपया विषयसं संवैधानिक समितिइ सहलह तकं मजूनिगु जुयाः अथे मस्यौदा संविधान जारी यानाः जूसां जनताया विश्वास त्याकाः संविधानसभाया म्याद थप यायेगु कुतः यानाच्वंगु खः धकाः सूत्रं धाःगु दु। राज्य पुनर्संरचना व शासकीय स्वरुपया सवालय् नं याकनं हे सहलह ब्याकेगु नापं सहमति जूगु खँ दुथ्याकाः सहमति मजूनिगु खँ दुमथ्याकुसे हे अथे न्हूगु संविधानया मस्यौदा पिकायेगु कुतः यानाच्वंगु खः। संवैधानिक व्यवस्था कथं मस्यौदा संविधान सार्वजनिक यानाः जनताया राय कयाः जक न्हूगु संविधानयात अन्तिम रुप बीमाःगु जुयाः हे अथे दलया नेतातय्सं कुतः यानाच्वंगु खः। उकिया नितिं नेपाली कांग्रेस नापं मेमेगु दलतलिसे नं सहलह ब्याकी धकाः धाःगु दु। तर नेपाली कांग्रेसं धाःसा राज्य पुनर्संरचना आयोग दयेकेगु जूसा जक संविधानसभाया म्याद थप यायेगु धकाः धयाच्वंगुलिं धाःसा माओवादी व एमालेयात ज्या मछिनाच्वंगु दु ।
