थरुहट व लिम्बुवान बन्द / पूर्वी जिल्लाया जनजीवन प्रभावित
थरुहट स्वायत्त राज्य परिषद व संघीय लिम्बुवान राज्य परिषदं याःगु बन्दया हुनिं थौं पूर्वया थीथी जिल्लाया जनजीवन प्रभावित जूगु दु ।
थरुहट स्वायत्त राज्य परिषदं निवा: न्ह्यः प्रधानमन्त्री, माओवादी नायः व मधेशी जनअधिकार फोरमया नायः दथुइ जूगु प्यंगू बुँदे सहमतिइ 'मधेश' खँग्वः छ्यलातःगु प्रति आपत्ति प्वंकूसें बन्द आव्हान या:गु खः ।
परिषदं नेपाःया अखण्डता, फुक्कसियां समान पहिचान व समावेशीया निंतिं स्वंगू दल दथुइ जूगु सहमति खारेजीया माग तकं याःगु दु । थरुहट क्षेत्रयात नं मधेश धकाः न्ह्यथनेगु पाय्छि मजूगु धासें परिषदं आपत्ति प्वंकूगु खः ।
बन्दया हुनिं पूर्वी तराईलय् बजाः, ज्याकूथी, विद्यालय पूर्णरुपं बन्द जूगु दुसाः राजमार्गय् सवारीसाधन ठप्प जूगु दु ।
उखे संघीय लिम्वुवान राज्य परिषदं जेठ १४ गतेया दुने हे न्हूगु संविधान निर्माण यायेमाःगु व उकि लिम्वुवान राज्यया सुनिश्चितता जुइमाःगु माग यासें थौं अरुणपूर्वया जिल्ला बन्द याःगु दु ।
बन्दया हुनिं अरुणपूर्वया पाँचथर, ताप्लेजुङ, इलाम लगायत गुंगू जिल्लाया जनजीवन प्रभावित जूगु दु । लिम्वुवान क्षेत्रय् शुक्रवाः सुथंनिसें बन्दया प्रभाव लाःगु दुसाः अन यातायात पूर्णरुपं ठप्प जूगु दु ।
