जनआन्दोलन दिवसया लुमन्तिइ देय्न्यंक ज्याझ्वः / संविधान जारी यायेमब्यूसाः जनता सतकय् : प्रचण्ड
२०४६सालया जनआन्दोलनया लुमन्तिइ एनेकपा (माओवादीं) थौं देय्न्यंक ज्याझ्वः यात । माओवादीं येँय् लगायत थीथी जिल्लाय् यायेगु ज्याझ्वय् माओवादी नायः लगायत केन्द्रीय दुजःतय्सं सम्बोधन यानादीगु खः ।
थ्वहे झ्वलय् माओवादीं येँया बसन्तपुलि याःगु ज्याझ्वलय् नायः पुष्पकमल दाहाल 'प्रचण्डं' सम्बोधन यानादिल । ज्याझ्वःयात सम्बोधन यायेगु झ्वलय् वय्कलं शान्ति व न्हूगु संविधान विरुद्ध षड्यन्त्र जूसाः आन्दोलन यायेगु ख्याच्वः बियादिल ।
मे दिवस निसें जनतायात सतकय् हयाः आन्दोलन यायेगु ख्याच्वः बियादिसें वय्कलं मे दिवस तक नं शान्ति व संविधान विरुद्ध षड्यन्त्र जूसाः जनता सुम्क मच्वनीगु धयादिल । वय्कलं अज्याःगु आन्दोलनं षड्यन्त्रकारीतय्त खरानी याइगु दावी तकं यानादिल ।
हिलंन्यकया हे शक्ति माओवादीयात तःछ्यायेत स्वयाच्वंगु दावी यानादिसें माओवादी नायः प्रचण्डं माओवादीयात तःछ्यायेत स्वयेवं तःमज्याइगु धयादिल ।
