'१४ गते न्हापांगु ड्राफ्ट जक'
येँ (सन्ध्या टाइम्स)/आः थःपिनि मूल मुद्दा धइगु शान्ति व संविधान हे जुइमाः व वइगु जेठ १४ गते गुगुं नं हालतय् संविधान जारी यायेमाः धकाः हालाच्वंम्ह माओवादी उपाध्यक्ष डा. बाबुराम भट्टराईनं हे आः जेठ १४ गते पूर्ण संविधान तयार मजुइफु धयादीगु दु ।
म्हिगः बीबीसीलिसे खँ ल्हासें वय्कलं जेठ १४ गते पूर्ण संविधान जारी मजूसां न्हापांगु ड्राफ्ट तक ला तयार जुइ ला धकाः आशा व्यक्त यानादीगु खः ।
यदि जेठ १४ गते संविधान जारी मजुल धाःसा हानं ई थपे यानाः संविधान च्वयेगु ला धइगु न्ह्यसःया लिसलय् धाःसा वय्कलं मौन जुसें 'खँ न्ह्यागु जूसां संवैधानिक शुन्यता धाःसा ताः ई जुयाच्वने मजिउ' धइगु बिचाः प्वंकादिल।
'अध्यक्ष प्रचण्डं ला छितः पार्टी तछ्याइन धकाः द्वपं बियादिल नि?' धकाः न्यंगु छगू न्ह्यसःया लिसलय् वय्कलं न्हिलाः धयादिल, 'वय्कःया बानी छिकपिंसं सि हे सिउ नि, न्ह्यागु नं हल्कानक्सां धया बीगु अले लिपा सच्चे यायेगु। थ्व खँ नं वय्कलं सच्चे यानादीधुंकल ।'
