जात्राय् ब्वाकेमाःम्ह सल नये मखनाः विरामी

ख्व प(सन्ध्या टाइम्स)/दँय्दसं मोहनिया इलय् पित हइम्ह ख्वपया तलेजुया ४२ दँ दुम्ह तुयूम्ह सल ताः ईनिसें बिरामी जुयाच्वंगु खँ तलेजुया मूल पुजारी नरेन्द्रप्रसाद जोशीं सन्ध्या टाइम्सयात कनादीगु दु। येँय् बसन्तपुरय् दुने च्वंगु तलेजुया देगलय् तयातइम्ह सलयात नेपाल सरकारं गाक्क रासनया व्यवस्था यानातःगु तर ख्वपया तलेजुइ धाःसा उकथंया छुं नं बन्दोबस्त मजुयाच्वंगुलिं नं तसकं बुरा जुइधुंकूम्ह उम्ह सल ताः ई न्ह्यवंनिसें नये हे मखनाः बिरामी जूगु खँ धाःगु दु। तलेजु भवानीया खड्ग जात्राया लागिं लहिनातःम्ह उम्ह तुयूम्ह सल आः सने हे मफयेक बिरामी जुयाच्वंगु तर वयात वासः याकेत धाःसा सुनां ध्यान तयाच्वंगु मदुनि ।

उम्ह तुयूम्ह सलयात दँय्दसं मोहनिया इलय् दशमिकुन्हु चान्हय् खड्गजात्रा कथं सल ब्वाकेत तलेजु देगःया लुँ ध्वाखांनिसें नवदुर्गा गण व तलेजु भवानीलिसें ख्वप नगरय् चाःहिकीगु खः। तलेजुया लिक्कसं लाःगु नांजाःगु ९९ चोक मध्येया छगू चोक बसन्ती चोकय् लहिनातःम्ह उम्ह सलयात सुसारें न हे मनकुसे तयातःगुलिं नं बिरामी जूगु खँ धाःगु दु। थ्व खँयात ध्यानय् तयाः उम्ह सुसारेयात ज्यां लिकाये धुनागु खँ गुथि संस्थानया प्रमुख अच्युतानन्द पोखरेलं कनादिल। उम्ह सलयात आः मिखाय् मोतियाविन्दु जुयाच्वंगु नं सीदुगु दु ।

पुरातत्व विभाग ख्वपया कथं पुलांम्ह सुसारेयात निष्काशन यायेधुंकाः आः उम्ह सलया सुसाकुसा यायेगु ज्या तलेजुया मूल नाइके नरेन्द्रप्रसाद जोशीयात बिउगु दु। आः च्वनेगु थाय् बांलाः मजूगुलिं व वासः याये मफयाच्वंगुलिं वइगु दँया लागिं तुयूम्ह सल ब्वाकेगु जात्रा हे संकटय् लायेफुगु खँ नं धाःगु दु। अनया जात्राय् तुयूम्ह हे सल ब्वाकेमाःगु चलन दु। गुथि संस्थानं उम्ह तुयूम्ह सलया लागिं बियातःगु न्हिं न्यय्तका दां मगाःगुलिं नं थ्व स्थिति वःगु खँ धाःगु दु। न्हूम्ह हे तुइम्ह सल हयाः ज्या तरे यायेमालीगु व आः तकं उकिया पहल धाःसा मजुनिगु सीदुगु दु ।