साईबाबाया सम्पत्ति कब्जा यायेत लडाइँ शुरु

लखौं अनुयायीत दुम्ह धार्मिक गुरु साई बाबाया स्वास्थ्य स्यना वंगु समाचार पिहां वयेवं वय्कःपाखें सञ्चालित अर्बौं तकाया सम्पत्ति दुगु संस्थाया मालिक सु जुइ धइगु खँय् ल्वापु शुरु जूगु दु। थुखे साई बाबा अस्पतालय् जीवन व मृत्युया दथुइ च्वनाः संघर्ष यानाच्वंगु इलय् उखे पुट्टपर्थीइ साई बाबाया ट्रष्टया दुजः व परिवारया दुजःतय् दथुइ सम्पत्ति कब्जाया संघर्ष शुरु जुयाच्वंगु दु।
साईबाबाया सम्पत्तियात कयाः ल्वापु शुरु जुइधुंकूगु खँ सीकाः न्यायाधीशतय् छगू पुचः हे पुट्टपर्थी वयाः सम्पत्तिया लेखाजोखा व जाँच यायेगु ज्या न्ह्याकेत्यंगु दु।
भारतया गुलिखे अदालतया न्यायाधीश व कानून व्यवसायी नापं साई बाबाया भक्त जुयाच्वंपिं दु ।

साई बाबाया मूल संस्था प्रशान्थी निलायम सञ्चालन यायेत छगू ट्रष्ट दयेका तःगु दु। थगुने तिनि साई बाबाया किजा जानकीरामया काय रत्नाकरयात उगु ट्रष्टया दुजः दयेकूगु खः। साई बाबाया परिवारं ट्रष्टया सम्पत्ति कब्जा यायेत सनाच्वंगु कुतःया हे छगू अंगया रुपय् रत्नाकरयात ट्रष्टया दुजः दयेकूगु अनुमान अबलय् नं जूगु खः।
साई बाबाया संस्थायात विश्वया आपालं मनूतय्सं आपालं सम्पत्ति दान यानाः बियातःगु कारणं थ्व संस्थायाके अकुत हे सम्पत्ति दु। साई बाबाया संस्थापाखें सुपर स्पेशियालिटी अस्पताल चले यायेत छम्ह विदेशीं ३०० करोड दां दान याःगु खः। थ्वहे अस्पतालय् थौंकन्हय् साई बाबया उपचार जुयाच्वंगु दु। अथे हे छुं दँ न्ह्यः तिनि संगीत कलेज खोले यायेगु लागिं मेम्ह छम्ह विदेशीं २०० करोड दां दान याःगु खः। थ्व बाहेक नं वय्कःया अल्याख अनुयायीतय्सं छुं ल्याःचाः हे मतसे साई बाबा व वय्कःया संस्थायात दान यानाच्वंगु दु। थ्वहे दामं वय्कलं सञ्चालन याइगु थीथी संस्थाया व्यवस्थापनया ज्या याना वयाच्वंगु खः।
खतुं साई बाबाया स्वास्थ्य बांलाःगु इलय् हे नं प्रशान्थी निलायमया ज्याखँ सुनां कायेगु धकाः चर्चा जुइगु जुयाच्वंगु खः। तर आः वय्कःया स्वास्थ्य बांलाः मजू धइगु खँ पिहां वयेवं थ्व चर्चां ल्वापुया हे रुप काःगु दु।
पुट्टपर्थीइ मेगा अस्पताल बाहेक वय्कःया ट्रष्टं बैंग्लोरय् नं छगू तःधंगु अस्पताल चले यानाच्वंगु दु। पुट्टपर्थी व अनन्तपुरय् आपालं शैक्षिक प्रतिष्ठानत नं चले यानाच्वंगु दु ।

अथे हे थ्व संस्थां अनन्तपुर व चेन्नईलय् छगू त्वनेगु लःया परियोजना नं चले यानातःगु दु। भारतय् सर्वसाधारण जक मखु, मन्त्री, न्यायाधीश, प्रशासक, प्रहरी, सेना, कासामि, कलाकारत नं आपालं हे बाबाया भक्त जुयाः सक्रिय जुयाच्वंगु दु। साई बाबाया ट्रष्टपाखें मुम्बई, उटी, हैदरावाद आदि थासय् नं थीथी कथंया अस्पताल व शैक्षिक प्रतिष्ठानत सञ्चालन यानाच्वंगु दु ।

साई बाबा मृत्युलिसे ल्वानाच्वंगु इलय् वय्कःया सम्पत्तियात कयाः मेगु ल्वापु पिहां वःगु खँय् वय्कःया अनुयायीत चिन्तित नं जुयाच्वंगु दु। वय्कःया अनुयायी मध्ये छम्ह मन्त्री जे. गीता रेड्डीं थज्याःगु संवेदनशील इलय् सम्पत्तिया ल्वापु पित महयेत सम्बन्धित पक्षतय्त इनाप याःगु दु ।

छखे साई बाबाया स्वास्थ्य व मेखे संस्था दुने सम्पत्तिया खँय् पिहां वःगु ल्वापुयात ध्यानय् तयाः पुट्टपर्थी लागाय् सुरक्षा व्यवस्था नं अतिकं कडा याना हःगु दु। पुट्टपर्थी लागाय् थौंकन्हय् ५०० म्ह प्रहरी तैनाथ याये हःगु दुसा प्रशान्थी निलायम लागाया जःखः प्रहरीया छगू बिस्कं चौकी नापं खडा यायेधुंकूगु दु। छुं जुयाः बाबाया स्वास्थ्य बारे बांमलाःगु खँ पिहां वयेवं संस्थाय् अज्याःगु छुं घटना जुल धाःसा तुरुन्त नियन्त्रण यायेमाः धकाः सुरक्षा व्यवस्था कडा याःगु खः। साई बाबाया भक्त जुयाच्वंपिं गुलिखे प्रहरी अधिकृतत बाबाया दर्शन याये थें अस्पताल व साई सेवा ट्रष्टया ज्याकुथी निरन्तर निगरानी तयाः सक्रिय जुयाच्वंगु दु ।

More Stories Like this