अव्यवस्थित नेपाल पर्यटन वर्ष

अमृतमान शाक्यभिक्षु

विश्वया थीथी मुलुकं आपालं पर्यटकत दुकयाः आम्दानी यानाच्वंगु दु। थ्वहे झ्वलय् नेपालं नं 'पर्यटन वर्ष' धकाः आपालं पर्यटक दुकायेगु ताः तःगु दु। खय्त ला नेपालय् दछियंकं हे पर्यटक दुहां वयाच्वंगु दु। थुगुसी पर्यटन वर्ष घोषणा यानाः पर्यटकतय्गु भीड हे जुइगु आशा यानाच्वंगु दु। नेपाल हिमाल, पहाड व थीथी कथंया प्राकृतिक सौन्दर्य दुगु देय् जूगु कारणं थन पर्यटकत अप्वः वइगु खः। विदेशीत ज्यां आराम कायेगु व न्ह्याइपुगु नेपाःया दृश्य स्वयेत थन वइगु खः। थुकिं यानाः पहाडी व हिमाली लागाया मनूतय्त छगू कथं रोजगारी चूलानाच्वंगु दु। पहाडी इलाकाया स्थानीय बासिन्दां तयाच्वंगु थीथी कथंया नसाज्वलं पसलं नं पर्यटकतय्त सालाच्वंगु दु। वर्तमान अवस्थाय् मिखा ब्वयेगु खःसा पहाडी इलाकाय् च्वंपिं स्थानीय मनूतय्गु निंतिं ला देशय् दुहां वःपिं पर्यटकत हे कमाईया मूल स्रोत जुइधुंकूगु दु। थुथाय् वाःचायेके माःगु खँ छु धाःसां पर्यटक वनीगु अप्वः धइथें थासय् स्रोत साधनया अभाव जुयाच्वंगु दु। थुगु भौतिक अभावया कारणं नं नेपालय् पर्यटन आगमन म्हो जूगु खः ला धइगु अनुमान जू। विदेशीतय्त सुविधा दयेवं गाः अले नेपाःयात ध्यबा दयेवं गाः। सायद थ्व हे जुयाः पर्यटकत भौतिक साधन अप्वः दुगु लागाय् हे वनाच्वंगु खनेदु। नेपाःया थाय्थासय् च्वंगु रोमांचकारी गुफा व झ्वाला तक वनेगु लँ हे मदयाः उगु लागा पर्यटन व्यवसायं तापाका च्वनेमाःगु दु ।

धात्थें धायेमाल धाःसा नेपाःया दुर्गम व सुगम थासय् सरकारं रेल सेवा न्ह्याकेमाःगु खः। अथे हे केबुलकार व मोटरपाखें सेवा बी फत धाःसां नं नेपाः भ्रमणय् वइपिंत सुविधा जुइ। खय्त ला देय्या आपालं थासय् हवाई सेवा मदुगु मखु। अन नं मोटरया लँ दयाः नं कचि सडकया खतरा आपालं दु। नेपाःया हिमाली लागाया निंतिं केबुलकारया सेवा दत धाःसा अनया बासिन्दातय्त लाभ हे जुइ। खय्त ला थुज्वःगु लागाय् खच्चर व भरियां नं ज्या बियाच्वंगु दु। नेपाः पहाडी मुलुक जूगुलिं थन केबुलकार व रेल सेवाया अतिकं आवश्यकता जुयाच्वंगु दु। सरकारं थुखेपाखे ध्यान बिउसा पर्यटकत नं अप्वः मात्राय् दुहां वइगु खइ। यातायात सुविधा दत धाःसा पहाडी इलाकाय् उत्पादन जुइगु वस्तु हयेत नं तसकं अःपुइगु खः। यदि गांगामय् सुविधा थ्यंकेगु खःसा शहरी इलाकां स्वयां नं अप्वः आम्दानी पहाडी इलाकां याये फइगु खः। तर सुविधाया अभावं नेपाःया थाय्थासय् अथाह प्राकृतिक सम्पदा दुगु जूसां नं थुगु लागाय् चाःहिउ वइपिं पर्यटकतय्गु ल्याः म्हो हे धायेमाः। दसुया निंतिं चीन, भारत व मेमेगु देशय् सुविधाया कारणं दुर्गम थासय् नं पर्यटकत चाःहिउ वनाच्वंगु झीसं खनाच्वना। यदि झीसं नं रेल व केबलकारं ज्या कायेगु खःसा विदेशीतय्त आपालं थासय् चाःहीकाः आय आर्जन याये फइगु खः ।

खय्त ला नेपाः जलस्रोतया निगूगु धनी देय् खः। अय्नं थन आः तक जहाज जक मखु सर्वसुलभ डुंगा तक नं न्ह्याके फयाच्वंगु मदु। लः यक्व दुसां अप्वः मात्राय् बिजुली उत्पादन याये फुगु मदुनि। झी नेपाःमि धइपिं ला अप्वः लः दःसां दुःख, लः म्हो जूसां दुःख जुइका च्वनेमाःपिं खः। नेपाःयात सम्पन्न यायेत मेमेगु देशं आपालं ग्वाहालि याःगु नं खः तर नेपाः थःगु तुति अझ नं दने फुगु मदुनि। यदि थःथाय् हे यक्व बिजुली उत्पादन याये फुगु जूसा ग्रामीण लागाया कुंकुलामय् तकं केबुलकार थ्यनेधुंकल जुइ। चिब्यागु लँय् विद्युतीय रेल नं न्ह्यायेधुंकल जुइ।
आः राजधानीपाखे मिखा ब्वये। धायेत ला राजधानी सर्वसम्पन्न थाय् खः। तर गुलि प्रगति जुल उलि हे दुर्गति नं जुयाच्वंगु दु। मौलिकता न्हंकाः आधुनिक छेँ व बजारं थाय् कयाच्वंगु दु, गुकिं यानाः विकराल थें हे जुइ धुंकल। गुलि नं छेँ अप्वल उलि हे समस्यात नं अप्वयाच्वन। अव्यवस्थित शहरीकरणं खुसित न्हनेगु क्रम अप्वयाच्वन। लँया समस्यां यानाः सडक जाम जुयाच्वन। आः राजधानी धइगु पर्यटक चाःहिलेगु थाय् हे मखयेधुंकल। विदेशीतय्त ध्यबाया स्वयां ईया अप्वः महत्व दइ तर झीत धाःसा ईया महत्व हे मदु। शहर, बजाःपाखे ब्वलनाच्वंगु बांमलाःगु लकस, अव्यवस्थित बँपसः व पार्किङ्गया समस्यां यानाः पर्यटकीय क्षेत्रय् नकारात्मक लिच्वः लानाच्वंगु दु। आप्रवासी मनूत दुहां वयाः थनया सम्पदा तकं नोक्सान यानाच्वंगु दु। स्वनिगः दुनेया धर्म, संस्कृति, जात्रा, पर्व, नखःचखःत नं बुलुहुँ बुलुहु न्हना वनाच्वंगु दु।
खय्त ला नेपाः अतिकं बांलाःगु देय् खः। थ्व देय्यात प्राकृतिक व साँस्कृतिक सम्पदां तःमि हे यानातःगु दु। तर राज्यं अज्याःगु सम्पदा क्षेत्रयात तिबः बियाच्वंगु मदु। दसुया निंतिं हनुमानध्वाखा थेंज्याःगु ऐतिहासिक लाय्कू लागायात वाय्त्यः-फ्वाय्त्यः याये थें पार्किङ्ग स्थल व बँ पसः तयेकाः बिजोग हे यानाच्वंगु दु। येँ, यल व ख्वप चाःहिलेगु झ्वलय् पर्यटकतय्सं झी पूर्खायात सकतां सम्पदाया थुवाः तायेकाच्वनी तर झीसं उकिया संरक्षण याये मसःगुलिं झीत गना नं थकी। शहरी लागाया जनघनत्वं यानाः सम्पदास्थल खुल्ला संग्रहालय खयां नं आपालं विकृतिं जायाच्वंगु थाय् व ल्याय्म्ह ल्यासे नापलायेगु डेटिङ्ग स्पट जुयाच्वंगु खनीबलय् पर्यटकत अजूचाइगु स्वाभाविक खः। नेपाःया जीवित द्यः कुमारीया दर्शक छक्वः कायेत पर्यटकत घण्टौं पीमाःसां पियाच्वनी। नेपाःया कुशल कालिगढतय्सं दयेकीगु हस्तकला खनाः पर्यटकत चकित जुयाच्वनी। उकिं पर्यटकत नेपालय् साला हयेगु निंतिं सडक सुधार व अव्यवस्थित यातायातयालिसें लकस नं सुचुपिचु धायेकेमाःगु अति आवश्यक जुयाच्वंगु दु ।

विश्वया थीथी लागाय् थें हे नेपालय् नं तसकं हे न्ह्याइपुगु थाय्त दु। उकिं पर्यटन वर्ष सुथांलाक्क हनेया निंतिं विश्वया आपालं आपाः पर्यटकत नेपालय् दुकायेगु निंतिं सम्भव जूगु हरेक कुतः यायेमाः। विदेशी पर्यटकत आपालं आपाः दुकायेगु धइगु हे नेपाःया आर्थिक स्तर थकायेगु खः। उकिं अझ अप्वः विदेशी पर्यटकत दुकायेगु योजना दयेकेत ताःलायेमाः ।

More Stories Like this