'देय्या संरक्षक कथं राष्ट्रपतिं जिम्मेवारी पूवंकेमाः'
उपराष्ट्रपति परमानन्द झां राजनीतिक दलतय्सं देय्यात निकास बिइगु ज्या पूवंकेमफुसाः देय्या संरक्षक कथं राष्ट्रपतिं उगु जिम्मेवारी पूवंकेमाःगु खँ धयादीगु दु । वय्कलं देय्यात निकास बिइमफुसाः राष्ट्रपति सुम्क च्वनेमज्यूगु तर्क तयादीगु खः ।
उपराष्ट्रपति झाया थःगु हे कार्यकक्षय् रिपाटर्स क्लबं बिहीवाः याःगु छगू साक्षात्कार ज्याझ्वलय् झां अन्तरिम संविधानं संरक्षकया कथं नालातःम्ह राष्ट्रपतिं राजनीतिक दलतय् जिम्मेवारी पूवंकेमाःगु धयादिल ।
मेगू छगू प्रशंगय् धाःसा उपराष्ट्रपति झां राष्ट्रपति डा. रामवरण यादव प्रति आक्रोशित जुयादिल । छुं दिं न्ह्य: राष्ट्रपति यादवं दुई तिहाई बहुमतया आधारय् संविधान जारी यायेमज्यूगु धकाः धयादीगु अभिव्यक्ति प्रति असन्तुष्टि प्वंकादिसें वय्कलं अन्तरिम संविधानया व्यवस्था कथं दुई तिहाई बहुमतं न्हूगु संविधान जारी यायेफइ ।
तर वय्कलं जेठ १४या दुने धाःसा संविधान जारी मजुइगु दावी यानादिल । गज्याःगु संविधान दयेकेगु बारे हे दलत दथुइ सहमति मजुनिगुलिं जेठ १४गेत संविधान जारी यायेमफइगु धयादिल । वय्कलं विवादित विषयलय् सहमति जुसाः छुं ई थप यानाः संविधन जारी यायेफइगु धयादिल ।
