कर्मचारीतय्सं राष्ट्र बैंकय् निघौ धर्ना

नेपाल राष्ट्र बैंकया कर्मचारीतय्सं थःगु माग सम्बोधन मजूगु धासें थौं बैंकया ज्याकूथी निघौ धर्ना बिउगु दु ।

राष्ट्र बैंकया गर्भनर डा. युवराज खतिवडायात ५० बुँदे माग तयाः लःल्हाःगु ज्ञापनपत्रया बारे छुं नं सुनुवाइ मजूगु धासें कर्मचारीतय्सं राष्ट्र बैंकया मू लुखाय् धर्ना बिउगु खः । अथेहे गर्भनर खतिवडायात नं कर्मचारीतय्सं ज्याकू दुहांवनेत १५ मिनेट पनातःगु खः ।

विनियमावली परिवर्तन, कर्मचारती वृत्ति विकास, संस्थागत सुधार लगायत माग तयाच्वंपिं कर्मचारीतय्सं थःपिनिगु माग छुं दिं दुने सम्बोधन मयासाः मेगू हप्ता निसें कडा आन्दोलन यायेगु ख्याच्वः बिउगु दु ।

थ्वस्वयां न्ह्यः कर्मचारीतय्सं फोगुन १ गते ३५न्हुया अल्टिमेटम सहित उगु ज्ञापनपत्र लःल्हाःगु खः ।