सरकारं वैशाष २० गते पूर्ण आकारया बजेट हइगु
पूरक बजेट हयेगु तयारी यानाच्वंगु सरकारं आः पूर्ण आकारया हे बजेट हइगु जूगु दु । मन्त्रिपरिषद्या थौं च्वंगु मुँज्यां वइगु वैशाष २० गते पूर्ण आकारया बजेट हयेगु औपचारिक निर्णय याःगु खः । थ्वस्वयां न्ह्यः सरकारं असार मसान्तय् आर्थिक दँया बजेट पेश यायेगु यानाच्वंगु खः ।
अथेहे मन्त्रिपरिषदं थीथी पूर्वाधार विकास परियोजनाया निंतिं भारत सरकारं बिइगु १७ अर्बया त्यासः ग्वाहालि कायेगु निर्णय याःगु दु । भारतं उगु त्यासाः नीदँया निंतिं १.७५या ब्याजदरं बिइत्यंगु खः । उखे विश्व बैंकं जलविद्युत परियोजना व युरोपियन युनियनं शान्ति व पुननिर्माणया निंतिं बिइत्यंगु २ अर्ब अनुदान ग्वाहालि नं कायेगु निर्णय याःगु दु ।
सरकारं फौजदारी कानुनय् सुधारया निंतिं सर्वोच्च अदालतया न्यायाधीश कल्याण श्रेष्ठया अध्यक्षताय् महान्यायाधिवक्ता युवराज संग्रौला व कानुन सचिव माधव पौडेल दुथ्याःगु उच्चस्तरीय कार्यदल निस्वंगु दु ।
अथेहे स्वास्थ्य सचिव सुधा शर्मायात राष्ट्रसंघया 'सानिटेशन एण्ड वाटर फर अल'या स्टेरिङ कमिटीया उम्मेदवार दयेकेगु निर्णय याःगु दुसाः नेपाल टेलिभिजनया कामु महाप्रबन्धकय् दिपकमणी धितालयात नियुक्त याःगु दु ।
१३क्वःगु दक्षिण एशियाली कासा सन् २०१४य् ग्वसाः ग्वयेत आवश्यक फुक्कं कथंया तयारी यायेत सरकारं खेलकुद मन्त्रालययात जिम्मा बिउगु दु । विशाल बजार कम्पनीया सरकारी जग्गा शेयरया कथं रुपान्तरण यायेगु निंतिं प्रक्रिया सुरु यायेगु निर्णय नं सरकारं याःगु दु ।
