बोगटीया संयोजकत्वय् राष्ट्रिय सम्मेलन समिति
उपसमितिया संयोजकय् प्रचण्डयात हे छ्वयेगु निर्णय
एकीकृत नेकपा (माओवादीं) थःगु पार्टी समर्थित स्वंगू समान्तर मजदुर संगठनयात भंग यायेधुंकाः पार्टी स्थायी समिति दुजः पोष्टबहादुर बोगटीया संयोजकत्वय् राष्ट्रिय सम्मेलन ग्वसाः समिति निस्वंगु दु ।
पार्टीया स्वम्ह शीर्ष नेतृत्वया पक्षधर मजदुर नेतातय्सं थःथःगु मजदुर संगठन निस्वनेवं पार्टी स्थायी समिति मुँज्यां स्वंगूलिं समितियात विघटन यानाः राष्ट्रिय सम्मेलन ग्वसाः समिति निस्वनेगु निर्णय याःगु खः ।
उगु हे निर्णय कथं थौं च्वंगु माओवादी पदाधिकारीतय् मुँज्यां बोगटीया संयोजकत्वय् ९३ दुजः दुगु समिति निस्वनेगु निर्णय याःगु खः । माओवादी न्वकु नारायणकाजी श्रेष्ठ 'प्रकाशं' पार्टी व मजदुर संगठनयात एकताबद्ध रुपं न्ह्याकेत बोगटीया संयोजकत्वय् समिति निस्वंगु जानकारी बियादिल ।
अथेहे मुँज्यां संवैधानिक समिति अन्तर्गतया उपसमितिया संयोजकय् माओवादी नायः पुष्पकमल दाहाल 'प्रचण्ड'यात हे छ्वयेगु निर्णय याःगु दु । पार्टीं न्वकु प्रकाशया नां समितिया संयोजक कथं प्रस्ताव याःसां मेगू दलतय्सं अस्वीकार यायेवं हानं प्रचण्डया हे नां प्रस्ताव याःगु खः ।
थौंया मुँज्याय् पार्टी पाखें सरकारय् ब्वति काइपिं मन्त्रीतय् नां क्वःछीगु धाःसां उगु ज्या जुइमफुत । मन्त्रीतय् नां क्वःछीत पदाधिकारीतय् मुँज्या शनिवाः च्वनीगु जानकारीं प्रकाशं बियादिल ।
