योजना आयोग हे मदयेक बजेट
येँ (सन्ध्या टाइम्स)/झलनाथ खनालया सरकारं वैशाख न्ह्यः हे पूरक बजेट हयेगु धकाः तयारी याःगु खःसां विपक्षी कांग्रेसया विरोधं यानाः पूरक मखु नियमित बजेट हे हयेत्यनागु खः धकाः धयाहःगु दु। तर देशय् योजना आयोग हे मदुगु इलय् सरकारं छु छु योजनाया लागिं सुयाके न्यनाः बजेट दयेकल जुइ धइगु न्ह्यसः धाःसा योजनाविद्तय्सं तयाहःगु दु ।
आयोगया निवर्तमान उपाध्यक्ष डा. जगदिशचन्द्र पोखरेलं राजीनामा बीधुंकाः राष्ट्रिय योजना आयोग खाली हे जुयाच्वंगु दु। अन न्हू नियुक्ति जुइ मफुनि। सरकारं बजेट दयेकीबलय् दकलय् न्हापां योजना आयोगयाके हे सुझाव काइगु खः। छु योजनायात गुलि बजेट तयेमाली धकाः पूर्ण जानकारी बीगु निकाय योजना आयोग खः। तर देशय् योजना आयोग हे मदुगु इलय् सरकारं सुयागु सुझाव कयाः बजेट फ्यात धइगु न्ह्यसः पिहां वःगु दु। यदि योजना हे मदयेक बजेट दयेकूगु खःसा उकिया अर्थ मदइगु व थः यस्सें योजनायात बजेट फ्याःगु खःसा थ्व सरकारया मनोमानी जुइगु दावी नं याना हःगु दु ।
