नेवाः वाङ्मयया विद्वान प्रा. सिग्फ्रेड लिनहार्ड मंत
येँ (सन्ध्या टाइम्स)/नेवाः भाय् बारे तःजिगु अध्ययन यानादीम्ह स्वीडेनया विद्वान प्रो. सिग्फ्रेड लिनहार्ड मंत। वय्कः ८४ दँ दुम्ह खः। नेवाः भाय् बारे दुग्यंक अध्ययन यानादीम्ह वय्कःयात पश्चिमया विशिष्ट विद्वान कथं कायेगु याः ।
वय्कलं नेवाः भासं च्वयातःगु पुलांगु सछिपु म्येँयात अनुवाद यानाः सन् १९७४ य् 'नेवारी गीति मंजरी' नांगु सफू पिकयादीगु खः गुगु नेपालभाषा ख्यलय् अतिकं नांजाः। अथे हे वय्कलं 'मणिचुडा-वदानोध्दृत' नं अनुवाद यानादीगु खः। वय्कलं 'विश्वन्तर जातक' नांगु बिलंपौयात कयाः नं अध्ययन यानादीगु खः। वय्कलं नेवाः भासय् प्रचलित 'सिंहसार्थबाहु' बाखंयात कयाः नं दुग्यंक अध्ययन यानादीगु खः ।
लिसें वय्कलं पाटन म्युजियमय् च्वंगु कृष्णलीला किपायात कयाः 'द दिभाइन लभ प्ले अफ कृष्ण' नांगु अध्ययन नं यानादीगु खः। वय्कलं नेपाःया बुद्ध धर्मया लिसें स्वनिगःया सांस्कृतिक सम्पदाया बारे आपालं अध्ययन यानादीगु दु ।
थगुने तिनि वय्कलं 'स्वयम्भु पुराण' बारे यानादीगु अध्ययन प्रकाशन यानादीगु खः। वय्कलं शुरुया ईपाखे च्वयादीगु 'नेवारी-द एन्सियन्ट ल्यांग्वेज अफ नेपाल' नांगु शोधपत्रयात डा. कमलप्रकाश मल्लं अनुवाद यानाः च्वसापासा व नेपाल प्रज्ञा प्रतिष्ठानपाखें प्रकाशित याःगु खः।
डा. कमलप्रकाश मल्लं वय्कःया मृत्यु झीगु वाङ्मयया निंतिं छगू तःधंगु क्षति खः धयादीगु दु। डा. मल्लया कथं भाजु लिनहार्ड नेवाः कला, धर्म व साहित्यया अध्ययनय् तसकं च्वन्ह्याःम्ह पश्चिमा विद्वान खः। नेपाःया आपालं पुलांपिं साहित्यकार व भाषाया अध्येतातलिसे वय्कःया बांलाःगु स्वापू दु ।
