दमक नगरय् वृहत् नेवाः मुना
येँ (सन्ध्या टाइम्स)/नेवाः देय् दबूया नायः नरेश ताम्रकारं दमकय् जूगु बृहत नेवाः भेलाया उलेज्या यानादिल।
नेवाः देय् दबू दमक नगर समितिया नायः नरेशकुमार श्रेष्ठया सभापतित्वय् जूगु उगु ज्याझ्वलय् स्वनिगलं पिने च्वंपिं नेवाःतय्त संगठित यायेगु ज्या यानादीगुलिं संस्थापक नायः दानबहादुर श्रेष्ठयात दोसल्लां न्ययेकाः हनेज्या याःगु खः ।
उगु बृहत नेवाः भेलायात संवोधन यासें नेवाः देय् दबूया नायः नरेश ताम्रकारं नेवाःत न्ह्यागु नं राजनीतिक विचार, न्ह्यागु नं आस्था व नेवाः दुनेया न्ह्यागु हे जाति व न्ह्याथाय् च्वंम्ह नेवाः जूसां न्हापां नेवाःयात स्वयेबलय् मेम्ह नेवाःयात थः नाले फयेकेगु वातावरण व नेवाः एकताया निंतिं नेवाः दुने च्वंगु विभेद मदुगु खँ न्ह्यथनादिल।
आः न्ह्यःने वयाच्वंगु राष्ट्रिय जनगणना २०६८ काः वइबलय् थःगु जातिया कोलमय् नेवाः जातिव भाषाया कोलमय् नेपालभाषा च्वकेगु अभियान न्ह्याकेत नं वय्कलं इनाप यानादिल ।
उगु ज्याझ्वलय् दमक नेवाः समाजया पुलांम्ह छ्याञ्जे प्रो. जग्यबहादुर श्रेष्ठ, नेवाः देय् दबूया झापा जिल्ला नायः कृष्ण उदास, देय् दबूया केन्द्रीय दुजः भाजु प्रकाश खड्गीपिंसं नं न्ववानादीगु खः ।
