'नक्कली मधेशवादीत कमल थापाया लाइनय्'
मधेशी जनअधिकार फोरमया नायः उपेन्द्र यादवं छुंछुं मधेशवादी धाःपिं नेतातय्सं न्हूगु जनादेशया पक्षय् वनेमाःगु धकाः कमल थापाया धापू न्वावनाजूगु द्वपं बियादीगु दु । भारत प्रति लक्षित यानादिसें वय्कलं उखे पाखें लिहांवयेवं मधेशी नेता धाःपिंसं थःगु धापू हिउगु धयादिल । वय्कल धयादिल, 'नक्कली मधेशवादीतय्सं तकं कमल थापाया लाइन न्ववाये सुरु यात ।'
सिरहाया लहानय् बिहीवाः पत्रकारतनाप खँल्हाबंला यानादिसें फोरम नायः यादवं संघीयता, धर्मनिरपेक्षता व गणतन्त्रया विरोधित न्हूगु संविधान निर्माण यायेमबीगु षड्यन्त्रय् लगेजुयाच्वंगु द्वपं बियादिल । वय्कलं थज्याःगु षड्यन्त्र ताःलाकेमबीत लोकतान्त्रिक, कम्युनिष्ट व मधेशवादी शक्तित छप्पँ जुइमाःगु बिचाः प्वंकादिल ।
संविधान निर्माणया ज्या ९० प्रतिशत क्वचायेधुंकूगु दावी यानादिसें यादवं शासकीय स्परुप व राज्य पुर्नसंरचनाया विषयलय् नं सहमति जूसाः जेठ १४या दुने हे संविधान निर्माण जुइगु दावी यानादिल ।
