उपसमिति संयोजकया नांमय् सहमति जुइमफुत
संवैधानिक समिति अन्तर्गतया उपसमितिया संयोजकय् एनेकपा (माओवादी)या नायः पुष्पकमल दाहाल 'प्रचण्डं' च्वनेत अस्वीकार यायेवं खाली जुयाच्वंगु पदया न्हूम्ह संयोजकया बारे प्रमुख स्वंगू दलं सहमति यायेमफुत ।
उपसमितिया संयोजकया विषयलय् सहलह यायेत थौं सिंहदरवारस्थित संवैधानिक समितिया सभापति निलाम्बर आचार्यया कार्यकक्षय् स्वंगू दलया शीर्ष नेतातय् मुँज्या च्वंगु खः ।
मुँज्याय् कांग्रेस व एमालें माओवादी नायःयात हे हानं संयोजकय् च्वनेत इनाप याःगु खः । निगू दलं दकलय् तःधंगु दलया नायः संयोजक कथं च्वंसा विवाद ज्यंकेत अपुइगु तर्क तःगु खः । तर माओवादीं धाःसा संयोजक थःगु पार्टीया जुइगु खःसा सु जुइगु धकाः निर्णय कायेगु पार्टीया आन्तरिक विषय जूगु खँ धाःगु खः ।
माओवादीं म्हिग च्वंगु संवैधानिक समितिया मुँज्याय् पार्टी न्वकु नारायणकाजी श्रेष्ठ 'प्रकाश'या नां संयोजकया निंतिं प्रस्ताव याःगु खः । माओवादीया उगु प्रस्ताव मेगू दलतय्सं धाःसा अस्वीकार याःगु खः ।
प्रमुख स्वंगू दलं नं थुगु विषयलय् निर्णय कायेमफेवं शुक्रवाः च्वनीगु संवैधानिक समितिया मुँज्यां संयोजकया बारे निर्णय याइगु जूगु दु । थौंया मुँज्याय् प्रधानमन्त्री झलनाथ खनाल, सभामुख सुभाषचन्द्र नेम्वाङ, संवैधानिक समितिया नायः निलाम्बर आचार्य, माओवादी नायः प्रचण्ड, कांग्रेस संसदीय दलया नेता रामचन्द्र पौडेल लगायतयता ब्वति दुगु खः ।
News Location:
