जमकटेलयात संयोजक मदयेकेत सुझाव
एनेकपा (माओवादी) समर्थित स्वंगू समान्तर मजदुर संगठन विघटन लिपा गठन यायेत्यंगु राष्ट्रिय सम्मेलन ग्वसाः समितिया संयोजकय् नेता शालिकराम जमकटेलयात मतयेत पार्टी न्वकु मोहन वैद्य 'किरण' व डा. बाबुराम भट्टराईं सुझाव बिउगु दु ।
पार्टी नायः पुष्पकमल दाहाल 'प्रचण्ड' व निम्ह न्वकु पक्षया पुचलं स्वंगू समान्तर मजदुर संगठन निस्वनेवं माओवादीं उकियात विघटन यानाः राष्ट्रिय सम्मेलन ग्वसाः समिति निस्वनेगु निर्णय याःगु खः । तर अज्याःगु समितिया संयोजकय् सुयात तयेगु धइगु बारे अझ नं पार्टी दुने विवादया विषय हे जुयाच्वंगु दु ।
माओवादी स्थायी समितिया मुँज्यां मजदुर विवादया बारे समस्या समाधान यायेमफेवं थुकिया जिम्मा पार्टी हेडक्वाटरयात बिउगु खः । उगु हे विषयलय् सहलह यायेत थौं च्वंगु पार्टी पदाधिकारी मुँज्याय् नं नेतात दथुइ सहमति जुइमफुत ।
पार्टी नायः प्रचण्ड, न्वकुत किरण व भट्टराई लगायत नेतातय् ब्वति दुगु मुँज्याय् निम्ह नेतातय्सं जम्मकटेलयात संयोजक मदयेकेत सुझाव बिउगु खः । जम्मकटेल पार्टी नायः पक्षया विघटित मजदुर संगठनया नायः खः ।
थौंया पदाधिकारी मुँज्यां नं मजदुर विवादया बारे निर्णय कायेमफेवं बुधवाः हानं सहलह यायेगु क्वःछिउगु दु । अथेहे थौंया मुँज्याय् पार्टी पाखें सरकारय् ब्वति काइपिं मन्त्रीतय् नां धलःया बारे निर्णय यायेगु धाःसां मजदुर विवादया विषयलय् हे मुँज्या केन्द्रीत जुइवं मन्त्री जुइपिनि नां धलःया बारे नं कन्हय् जक सहलह याइगु जूगु दु ।
