नकली भ्याट बील, विनोद चौधरी व संचार माध्यम
समाचार विश्लेषण
येँ (सन्ध्या टाइम्स)/नकली भ्याट बील दयेकाः राजश्व ठगे याःगु खँयात कयाः अर्थ सचिव रामेश्वर खनालं राजीनामा बिउगु घटनायात कयाः सरकारया आलोचना यायेगु ज्याय् फुक्क धइथें सञ्चार माध्यमत ला लगे जुल, तर रामेश्वर खनालं कारवाही यायेमाःपिं मनूत धकाः इंगित याःपिं नकली बील दयेकूपिं ठग व्यापारीतय् बारे धाःसा छुं हे 'तःधंगु' संचार माध्यमतय्सं समाचार मच्वःगु खनाः आम पाठकत अजूचाःगु दु ।
नकली भ्याट बील दयेकाः राजश्व ठगे याःगु बारे छानबीन यायेत गठन याःगु राजश्वया आयोगं तयार याःगु प्रतिवेदनय् वाईवाई चाउचाउ कम्पनीया मालिक विनोद चौधरी व वय्कःया दाजुकिजापिं समेत जानाः नकली भ्याट बील दयेकूगु धकाः प्रतिवेदन हे तयार याना तयेधुंकूगु दु। उगु प्रतिवेदनयात आः तक सार्वजनिक जक मयाःनि। तर प्रतिवेदन सार्वजनिक मयाःनिसां थुलि थुलि राजश्व ठगी जूगु दु धकाः पूरा विवरण सिउपिं सञ्चार माध्यमतय्सं अथे ठगी याःपिं चाहिं सु सु खः धकाः मसीगु खँ हे मदु। तर उमिगु नां धाःसा सार्वजनिक यानाच्वंगु मदु। व्यापारीतय् नां सार्वजनिक मयाःगुया लिउने उगु व्यापारीतलिसे संचार माध्यमतय्सं यानाच्वंगु प्रत्यक्ष अप्रत्यक्ष व्यापारिक कारोवार हे जुइमाः धइगु दावी सूत्रं याःगु दु ।
राजश्वया पुचलं चौधरी समूहया सीजी इम्पेक्स व सीजी इलेक्ट्रोनिक्सपाखें ६ करोड तकाया नकली बील दयेकातःगु लुइकूगु दु। अथे हे चौधरीया सीजी फुडं १० करोड तका बराबरया नकली बील दयेकातःगु लुइकूगु दुसा चौधरीया किजा अरुण चौधरीया अरुण इन्टरकन्टिनेन्टलपाखें १६ करोड तकाया नकली बील दयेकातःगु नं लुइकूगु दु ।
