जनबाहाःद्यःया रथ दयेकेगु शुरु

येँ( सन्ध्या टाइम्स)/दँय्दसं सालीगु जनबाहाःद्यःया रथ जात्राया लागिं म्हिगःनिसें रथ दयेकेगु ज्या न्ह्याकूगु दु। जमःया तीनधारा पाठशालाया पिने तयाः थ्व रथ दयेकूगु खः। उकिया लागिं म्हिगः कमलादी गणेद्यःयाथाय् स्टोर याना तःगु रथया पांग्रा लगायतया थीथी ज्वलं ल्ह्ययेगु ज्या याःगु दु ।

थुगुसी नं रथ दयेकेत न्हापा थें हे स्वयम्भुरत्न वज्राचार्यया संयोजकत्वय् ७ म्ह दुजः दुगु रथ निर्माण उपसमिति गठन याःगु दु। रथ दयेकेगु ज्या थ्वहे उपसमितिं याइगु खः। संयोजक वज्राचार्यं कनादी कथं थुगुसी रथया जग कथं तइगु प्यंगः मुख्यगु थां मध्ये स्वंगः न्हूगु हे तयेगु ज्या जुइत्यंगु दु। थ्व थांयात 'तःथां' धाइ। थ्व थां थुगुसी परम्परा कथं नःसिँयागु हे तयेत्यंगु खः ।

जनबाहाःद्यःया रथ ३२ कु तजाः जुइ। थुकी तकूगु चिकूगु यानाः मुक्कं ३६५ कू सिँ छ्यलेमाःगु खँ संयोजक वज्राचार्यं कनादिल। दछिया ३६५ न्हि दइ थें थ्व रथय् नं ३६५ कू हे सिँ दइगु नं छगू विशेषता हे जूगु वय्कलं कनादिल। म्हिगः दयेकूगु थ्व रथ छवाः लिपा दयेके सिधयेकाः जात्रा याइ।
थुगुसी जनबाहाःद्यःया रथ जात्रा व्यवस्थित यायेत थीथी खलः पुचः क्लबत जानाः व्यवस्थापन समिति नं दयेकूगु दु ।