क्वचाल पाहांचःर्हे
थुगुसीया पाहांचःर्हे म्हिगः विधिवत रुपं क्वचाल। म्हिगः न्हिनय् असनय् स्वम्ह अजिमाया खः ल्वाकाः पाहांचःर्हेया मू जात्रा जूगु खः ।
असनय् म्हिगः वतु भद्रकाली, तेबाहाः भद्रकाली व कंग अजिमाया खः हयाः चाःहीकाः थवंथवय् तिंप्वाः हिलेगु ज्या याःगु खः। थुकियात द्यः ल्वाकेगु जात्रा नं धायेगु याः। असनय् द्यः ल्वाकूगु इलय् स्थानीय भिंतुना गुथिपाखें परम्परागत रुपं चतांमरि ह्वलेगु ज्या नं याःगु खः। जात्राय् म्हासुगु तपुलि, वँचुगु तपुलि व ह्याउँगु तपुलि पुना वःपिं पुचःतय्सं बाजं थानाः प्याखं हुलाः न्ह्यइपुकेगु ज्या नं याःगु खः। जात्रा क्वचायेकाः स्वखलकं थःथःगु त्वालय् लिहां वंगु खः। पाहांचःर्हेबलय् थ्व बाहेक मेपिं द्यःपिनि नं जात्रा जुइ ।
