नेवाः पुचः इटहरीया झिंनिक्वःगु दँमुँज्या
येँ (सन्ध्या टाइम्स)/नेवाः पुचः इटहरीया झिंनिक्वःगु दँमुँज्या व साधारणसभा नकतिनि क्वचाल। नेवाः देय् दबूया नायः नरेश ताम्रकारं उलेज्या यासें ज्याझ्वः न्ह्याकूगु खः। नेवाः पुचःया नायः चित्रमान प्रधानया सभापतित्वय् जूगु उगु ज्याझ्वलय् नेवाः पुचःया प्रतिनिधित्व यासें नेवाःतय्गु राष्ट्रिय संगठन नेवाः देय् दबूया नायः पदय् तक थ्यंके फुगुलिं देय् दबूया नायः नरेश ताम्रकारयात दोसल्लागां न्ययेकाः हनेज्या नं याःगु खः ।
अथेहे इटहरी लगायतया थासय् नेवाःतय्गु संस्कृति बारे प्रचार व स्यनेगु ज्याय् ग्वाहालि याःगुलिं मध्यपुर कला परिषदया गणेशराम लाछियात नं दोसल्लां न्ययेकाः हनेज्या यात। इटहरी नेवाः पुचः नीस्वनेत ग्वाहालि याःगुलिं मदुम्ह उमेश श्रेष्ठयात नं हन। अथेहे इटहरी नेवाः पुचःयात जग्गा दान याःपिं मध्ये दकलय् अप्वः दां बियादीपिं पुलांम्ह नायःपिं राजेश श्रेष्ठ व काजीलाल श्रेष्ठयात नं हन। ज्याझ्वलय् ज्याजंक्व सिधःपिं स्वम्ह नेवाःतय्त नं हनेज्या याःगु खः ।
एसएलसी अप्वः ल्याः हःपिं प्यम्ह विद्यार्थीतय्त नं सम्मान याःगु उगु ज्याझ्वलय् न्ववासें नेवाः देय् दबूया नायः नरेश ताम्रकारं नेवाःतय्त छप्पँ व छधी यासें नेवाः पहिचान सहितया नेवाः राज्य व पिनेच्वंपिं नेवाःतय्गु पहिचान सहित प्रतिनिधित्वया निंतिं नेवाः देय् दबुलिं संविधानय् च्वकेत दवाव बियाच्वनागु खँ कनादिल। आदिवासी जनजाति महासंघ इटहरीया सचिव मीन आलेमगरं आदिवासी आन्दोलनय् नेवाःतय्सं अग्रणी भूमिका म्हिताच्वंगु खँ कनादिल ।
