नेतातय्त खबरदारी यानाच्वनेत भट्टराईया इनाप
एनेकपा (माओवादी)या न्वकु डा. बाबुराम भट्टराईं विवादय् त:क्यनाः ल्वानाच्वंसाः नेतातय्त खबरदारी यायेत जनतायात इनाप याःगु दु । वय्कलं हरेक पार्टी दुने राजा रजौटाया प्रवृत्ति दुगु धयादिसें मजबुत जुयाः अज्याःगु प्रवृत्तिया सामना यायेमाःगु धयादिल ।
गोरखा विद्यार्थी समाजं थौं येँय् याःगु बृहत्त गोरखाली नापलाय्गु व तुच्चा ज्याझ्वलय् वय्कलं शान्ति प्रक्रियायात क्वचायेकाः न्हूगु संविधान दयेकेगु आःया मू आवश्यकता जूगु धयादिल । वय्कलं जनतां ब्युगु थुगु कार्यभार विरुद्ध वंसाः न्हूगु ढंगं आन्दोलन यायेगु ख्याच्वः नं बियादिल ।
शान्ति व संविधानया कार्यभार पूवंकेमबीत राष्ट्रपतियात न्ह्यने हयाच्वंगु तर्क तयादिसें भट्टराईं थज्याःगु षड्यन्त्र जुइमबीत फुकसितं सतर्क जुइत इनाप यानादिल ।
ज्याझ्वलय् माओवादीया मेम्ह न्वकु नारायणकाजि श्रेष्ठ 'प्रकाशं' शान्ति प्रक्रिया व संविधान निर्माण यायेगु ज्याय् अवरोद्ध यायेगु कुतः जूसाः जनविद्रोह मार्फत क्रान्ति पूवंकेगु ख्याच्वः बियादिल ।
