माओवादीं उपसमितिया संयोजकय् प्रकाशया नं प्रस्ताव, मेगू दलतय्सं अस्वीकार
संविधान निर्माणया झ्वलय् खनेदुगु विवाद ज्यंकेत संवैधानिक समिति अन्तर्गत निस्वंगु उपसमितिया संयोजक हिलेत माओवादीं प्रस्ताव तःगु दु । माओवादीं उगु पदय् थःगु पार्टीया न्वकु नारायणकाजि श्रेष्ठ 'प्रकाश'या नां प्रस्ताव याःगु खःसां मेगू दलतय्सं धाःसा उकियात अस्वीकार याःगु दु ।
माओवादी नायः पुष्पकमल दाहाल 'प्रचण्ड'या संयोजकत्वय् निस्वंगु उगु उपसमितिया म्याद निक्वःगु खुसिइ तनेधुंकाः प्रचण्डं थःगु कार्यव्यस्तताया हुनिं हानं संयोजक जुइत अस्वीकार याःगु खः । वय्कलं संयोजक जुइत अस्वीकार यायेवं थौं च्वंगु संवैधानिक समितिया मुँज्याय् माओवादीं प्रकाशया नां न्ह्यने हःगु खः ।
प्रधानमन्त्री झलनाथ खनाल, सभामुख सुभाषचन्द्र नेम्वाङ, संवैधानिक समितिया सभापति निलाम्बर आचार्य, माओवादी नायः प्रचण्ड, कांग्रेस संसदीय दलया नेता रामचन्द्र पौडेल लगायत नेतातय् उपस्थिति दुगु मुँज्याय् उपसमितिं याःगु प्रगतिया बारे नं समिक्षा जूगु खः ।
