राजश्व छली याःपिंत कारवाही यायेगु प्रमया प्रतिबद्धता
प्रधानमन्त्री झलनाथ खनालं नक्कली भ्याट बिल दयेकाः कर छले याइपिंत कारवाही यायेगु प्रतिबद्धता प्वंकादीगु दु ।
अर्थसचिव रामेश्वर खनालया राजीनामा प्रकरणयात कयाः थौं संसदय् लिसः बियादिसें प्रधानमन्त्री खनालं कर छले याइपिंत सरकारं छुं नं हालतं छुट मबीगु धयादिसें नेपालय् राजश्व छलीया अवस्था ग्यानापुसे च्वंगु धयादिल ।
कर छली याइपिंत निरुत्साहित व नियन्त्रण यायेत सरकार प्रतिबद्ध दुगु स्पष्ट यानादिसें वय्कलं थज्याःपिंत छुट बिइत सरकारं कानुन संशोधन याइगु बारे ला झन् बिचाः हे यायेमफगु धयादिल ।
अर्थसचिव खनालं अर्थमन्त्रीया हुनिं राजीनामा बिइमाःगु धासें नेपाली कांग्रेसं प्रधानमन्त्रीं संसदय् लिसः बिइमाःगु माग तयावयाच्वंगु खः । उकिया लिसः बियादिसें प्रधानमन्त्री खनालं अर्थसचिवया राजीनामं थः नं अश्चर्यय् लाःगु धयादिसें वय्कःयात राजीनामा बिइत छुं नं कथंया दबाव मबीयाःगु धयादिल ।
अथेहे प्रधानमन्त्री खनालं युनिटीया दोषीतय्त कारवाहीया निंतिं छानबिन जुयाच्वंगु धयादिल । उखे भरतपुर अस्पतालया समस्या नं याकनं समाधान जुइगु विश्वास प्वंकादिसें वय्कलं नेपाल आयल निगमया बारे सरकारं निस्वंगु समितिया सुझाव कथं न्ह्यावनीगु धयादिल ।
