नेवाः संस्कृतिइ क्रिश्चियन नं पायो पिहां वल

यल (सन्ध्या टाइम्स)/नेवाः संस्कृति कथं यलया सुबाहालय् च्वंपिं ज्यापुतय् अजूचायापुगु पायो पिहां वइगु झ्वलय् न्हापालिपा गबलें मजूनि कथं म्हिगः क्रिश्चियन धर्मय् वनाच्वंम्ह मनू तकं दिगिदिगिं खात ।

क्रिश्चियन धर्मय् उम्ह गुथियार म्हिगः अथे खाःगु खनाः मनूत अजूचाःगु दु। उलि जक मखु थ्वँ अय्लाः धइगु हे मत्वनीम्ह व ला तकं मनइम्ह फैकु महर्जन नांया मेम्ह मनू नं दिगिदिगिं खाना वःगु खः। अथे हे स्वास्थ्य क्षेत्रय् ज्या यानादीम्ह माइला महर्जन नं खाःगु खः। म्हिगः सुथय् ८ बजेनिसें हे क्रिश्चियन धर्मय् वनाच्वंम्ह नन्द महर्जन नापं न्हय्म्ह गुथियारत खाःगु खः। मुक्कं १५० म्ह गुथियारत दुगु उगु सी गुथिया न्हूम्ह आजु ल्ययेगु नापं गुथिया सामान छम्ह आजुया छेँनं मेम्ह आजुया छेँय् यंकेगु झ्वलय् गुथियारत अथे खाइगु खः। थुगुसी आशालाल महर्जन, सिद्धिलाल महर्जन, राम महर्जन, फैकु महर्जन, धनलाल महर्जन व माइला महर्जन नं खाःगु खः। आजु जुयाच्वंम्ह मदयेवं आजु मदुगु दच्छि दुगु दिं खुन्हु हे न्हूम्ह आजु ल्ययाः गुथिया ल्वाभः नापं थीथी कथंया सामानत यंकेगु झ्वलय् गुथि दुहां वनेवं गुथियारत खाना वइगु खः। आवंलि उगु गुथिया आजु सानुकाजी महर्जन जुयादीगु दु। अथे दिगिदिगिं खानावःपिं खुम्ह गुथियारत मध्ये धनलाल महर्जन थौं सुथय् तकं खानाच्वंगु दनि। उकिं थौं क्षमा पूजा यायेगु ज्या जूगु खँ गुथिया थाकुलि चन्द्र महर्जनं कनादिल। अथे धनलाल महर्जन थौं तक नं खानाच्वंगुलिं गुथियारत गुथिइ मुनेगु ज्या थौं सुथंनिसें हे जुयाच्वंगु दु ।

उगु पायो पिहां वःगु स्वयेत सुबाहालय् आपालं मनूत वःगु खः ।