नेवाः पुचः सुरुंगाया न्हूधाः
झापा (सन्ध्या टाइम्स)/नेवाः पुचः सुरुङ्गाया निक्वःगु अधिवेशन छगू ज्याझ्वः यासें क्वचाल। सामुदायिक भवन सुरुङ्गाय् पुचःया नायः नरेन्द्र श्रेष्ठया सभापतित्वय् उगु ज्याझ्वः जूगु खः। ज्याझ्वलय् मूपाहां कथं प्रमुख जिल्ला अधिकारी शशिशेखर श्रेष्ठ झाःगु खःसा विशेष पाहा कथं नेवाः देय् दबू झापाया नायः कृष्ण उदास व नेवाः बुद्धिजीवी प्रा. चित्रबहादुर श्रेष्ठ झाःगु खः। अथे हे झापाया २५ गू खलःपुचःया अध्यक्ष व प्रतिनिधि लिसें स्वंगू मिसा पुचःया अध्यक्ष व प्रतिनिधितय्सं नं ब्वति काःगु खः ।
ज्याझ्वलय् नुगःखँ तयेगु झ्वलय् विशेष पाहां कृष्ण उदासं भाषा, कला, संस्कृति तनाः जातय् जक सीमित जूपिं स्वनिगलं पिनेयापिं नेवाःतय्सं आः जुइगु राष्ट्रिय जनगणनाय् नेवाःतय्गु खःगु तथ्याङ्क कायेत दक्व खलः पुचःतय्सं विशेष जिम्मेवारी कायेमाःगु व आः दयेकीगु संविधानय् नेवाःतय्त नेवाः स्वायत्त राज्य दयेमाःगु खँ तयादिल ।
मूपाहां प्रमख जिल्ला अधिकारी शशिशेखर श्रेष्ठं थौं स्वदेशय् जक मखु यूरोपियन देशत नं थःगु पहिचान मालाच्वंगु स्थिति दु धयादिल ।
निक्वःगु अधिवेशनं पुचःया न्हूगु कार्यसमिति नं सर्वसम्मतं ल्यःगु दु। न्हूधाः कथं पुचःया नायः रत्न कुमार श्रेष्ठ जुयादीगु दुसा न्वकु तिलक बहादुर श्रेष्ठ, छ्यांज्ये मोहन कुमार श्रेष्ठ, लिउ छ्यांज्ये तेज कुमार श्रेष्ठ, दांभरि जित कुमार श्रेष्ठ व दुजलय् पूर्ण लाल श्रेष्ठ, यसोदा श्रेष्ठ, कमला श्रेष्ठ, भिम बहादुर श्रेष्ठ व लोकमान श्रेष्ठ च्वनादीगु दु।
ज्याझ्वलय् पाहांपिंत मतिनाया चिं कथं राष्ट्रिय विभूति शंखधर साख्वाःया किपा इनाबिउगु खः ।
