जिगु लुमंतिइ ज्ञानबहादुर न्याइच्याई

कृष्ण प्रजापति

ज्ञानबहादुर न्याइच्याईयात जिं दकलय् न्हापां थौं स्वयां पाय्छि स्वीदँ न्ह्यः म्हसियागु खः। २०३८ साल बैशाख २७ गते जूगु राष्ट्रिय पंचायतया निर्वाचनया झ्वलय् वय्कः ख्वप नगरया त्वाः त्वालय् 'जनताया उम्मेदवार' धाधां कर्णप्रसाद ह्योजूयात ज्वनाः चुनावी मैदानय् कुहां झाःगु खः। उगु इलय् विद्युतीय सञ्चार माध्यम रेडियो नेपालय् '२०३८ साल बैशाख २७ गते, राष्ट्रिय पंचायतको निर्वाचन हुन्छ सत्य' धाधां चुनाव प्रचार जुजुं वनाच्वंगु खः। खरानी रंगया ख्वातुगु सर्ट पाइन्ट फिना जुइम्ह वय्कःयात सर्वसाधारण जनतां उगु इलय् हे बांलाक किसान नेता कथं म्हसी धुंकूगु जुयाच्वन। उकथंया वसः लिपा ताः ई तक पुलांम्ह मेयर आशाकाजी बासुकलां नं फिना जूगु खना। उकिया दछि लिपा २०३९ सालया स्थानीय निकायया निर्वाचनय् ला वय्कः ख्वप नगर पंचायतया प्रधानपंच कथं जनताया दथुइ खने दये धुंकूगु जुल ।

नगर प्रमुख जुइधुंकाः नं शिक्षा मन्त्रालयं प्रावि तह तक जक निःशुल्क यानातःगु इलय् वय्कलं ख्वप नगर क्षेत्रया फुक्कं सार्वजनिक विद्यालयय् निमावि तह तक देशय् गनं मजू कथं कक्षा ७ तक निःशुल्क पठनपाठनया व्यवस्था यानादीगु खः। नापं सनिलया इलय् प्रौढ कक्षा चले याःबलय् आपालं मिस्त व मिजंतय्सं नं साँवा अक्षर म्हसीकेगु मौका चूलाकूगु खः। उगु हे इलय् ख्वप नगरय् जुयाच्वंगु अत्यधिक फोहोर व्यवस्थापनया लागिं वय्कः थः हे च्वाफि ज्वनाः सफाई अभियानय् लगे जुयादीगु खः। लिपा आशाकाजी वासुकला मेयर व थः १७ वडाया वडा अध्यक्ष जूबलय् नं वय्कलं नगर विकासय् तःधंगु योगदान यानादिल। ख्वप नगरपालिकां हाल शैक्षिक लागाय् याःगु प्रगति व २०५४ साल लिपा प्रेम सुवाल ख्वप
नगरपालिकाया मेयर जूबलय् ख्वप नगरयात एशियाया हे झिगू सफा व सम्पदा संरक्षण जूगु नगरया रुपय् युनेस्कोपाखें पुरस्कृत जुइत ताःलाःगुली ज्ञानबहादुर न्याइच्याईया तःधंगु योगदान दु ।

ज्ञानबहादुर न्याइच्याईनं धाःसा जितः २०४६ साल आन्दोलनया इलय् जक बांलाक म्हसिल। २०४५ साल भाद्र ९ गते जूगु भक्तपुर काण्डया झ्वलय् वय्कः केन्द्रीय कारागार (सेन्ट्रल जेल)य् च्वंबलय् जि २०४६ साल फागुन ७ गतेनिसें न्ह्याःगु संयुक्त जनआन्दोलनया झ्वलय् ज्वंगुलिं उगु हे जेलय् लाःवंगु खः। चैतया निभालय् वय्कः सेन्ट्रल जेलया दथुइ च्वंगु सिमा तलय् च्वनाः कैदीतय्त नकीगु ग श्रेणीया ल्वहंफि ल्वाकज्याःगु जाकि ल्ययाच्वनी। जिपिं राजबन्दी जूगुलिं पंचायती सरकारं जिमित धाःसा क श्रेणीया रासन बीगु। जिमि छगू हे मेसय् जा थुइगुलिं छछाःया लागिं छमनात्याया ल्याखं बीगु न्हिं स्वमना जाकि जिमित अप्वः जुइगु।बचे जूगु जाकि व छेँनं हइगु आलु तरकारी व केँ जिमि १५/२० म्ह भक्तपुर काण्डया झ्वलय् लाःपिं ख्वपया न्ह्यलुवा राजनीतिक कार्यकर्तात व ५/६ म्ह राजबन्दीत मिले जुयाः नयेगु।
जेल थ्यने न्ह्यः पंचायत सरकारं बिउगु यातनाया कारणं उगु इलय् ज्ञानबहादुर न्याइच्याईया न्हनय्पं ताये मदुगु व म्ह मना वयाच्वंगु जुयाच्वन। वय्कलं वसः त्वःताः म्ह पचिपचि यायेत जितः धयादी। बन्दीत मध्ये अग्रजम्ह नं जूगुलिं जिं नापं च्वनाः म्ह पचिपचि याकेगु व सनिलय् ६ बजे बहनीया जा नयेधुंकाः जेल दुनेया टेनिस कोर्ड व खुल्ला थासय् घण्टौं तक ओहोरदोहोर यायेत ग्वाहालि यायेगु। चैत २५ गते जिपिं सेन्ट्रल जेल त्वःता वये त्ययेकाः नं जिलिसें जेलय् लाःम्ह तालको त्वाःया घाइते योद्धा हरिसुन्दर प्रजापति व जितः वय्कलं इलय् ब्यलय् संगठन व राजनीतिक गतिविधिइ नं दुथ्यायेगु क्रम जारी याना च्वँ धकाः सल्लाह बियादिल। बाखं कनाः थःगु धारणा तयादीम्ह वय्कःया राजनीतिक जीवनया थीथी थज्याःक्वथ्याःयात उगु इलय् हे जिं बांलाक थुइकेगु ह्वःताः चूलाकागु खः ।

थम्हं हे न्ह्यब्वयाः चुनाव प्रचार यानाः त्याका छ्वःम्ह कर्णप्रसाद ह्योजूं लिपा पंचायती व्यवस्थालिसे मिले जुयाः जनताया सेवा त्याग याःगु खँयात वय्कलं द्यः म्हय् मदुम्ह गधाया संज्ञा बियाः बाखं न्यंकुसें चुनावी मैदानय् कुहां वःगु ख्वपबासीतय्त लुमंकातःगु दनि। अथेहे खराचा व गाजल बाया बाखं, पुखू हिलेगु नामय् न्यातय्त छम्ह छम्ह यानाः ब्वहचां मेगु पुखूया सिथय् च्वंगु सिमा च्वय् च्वनाः नःगु व कलिं वयात पलेसा काःगु बाखं वय्कलं न्यंकादीगु तसकं लोकंह्वाःगु बाखंत खः। बाखं न्यंकेगु व किसानतय् हरेक समस्या थुइकेगु शक्ति दुम्ह जूगु ल्याखं नं ज्ञानबहादुर न्याइच्याई किसान समुदायया दथुइ तसकं लोकंह्वाःगु नां जुइत ताःलाःगु खः। वय्कः प्रधानपंच जुयाच्वंगु इलय् खौमाय् मास्टर जगतसुन्दर मल्लया झ्वाता तःबलय् पंचायती सरकारं चांचां उगु झ्वाता ज्वनावंगु खः। २०४४ सालय् जूगु स्थानीय निर्वाचनय् वय्कः १७ वडाया वडा अध्यक्ष पदय् निर्वाचित जुयादिल। प्रजातन्त्र पुनर्वहाली लिपा २०४९ सालय् जूगु स्थानीय निर्वाचनपाखें वय्कः ख्वप नगरपालिकाया नगर प्रमुख जुयादिसें नगरया विकास निर्माण व सरसफाई अभियानय् सक्रिय जुयादिल। असल जनप्रतिनिधिया हैसियत तयेत ताःलाःम्ह वय्कः लिपांगु स्थानीय निर्वाचन २०५४ य् हाकनं १७ वडाया अध्यक्ष जुयाः निरन्तर ख्वप नगरपालिकालिसे आवद्ध जुयाः ज्या यानादीगु खः ।

थुकथं छम्ह इमान्दार पार्टी कार्यकर्ताया क्षमता क्यनेत ताःलाःम्ह मिलनसार व्यक्तित्व ज्ञानबहादुर न्याइच्याई अन्तिम कार्यकालय् पुलांम्ह मेयर प्रेम सुवाल व बासुदेव जोशीपिं नाप बेलायत भ्रमणय् नं झाल। नेमकिपाया वडा ईकाइ कमिटी, ख्वप नगर समिति व जिल्ला समितिया अध्यक्ष पदय् च्वनाः थीथी इलय् पार्टीया नेतृत्व तहलय् थ्यंकादीम्ह वय्कःयात आजीवन इमान्दार कार्यकर्ताया रुपय् खनेदुगुलिं उकिया कदर यानाः लिपांगु इलय् २०६६ सालय् च्वंगु नेमकिपाया केन्द्रीय परिषदं केन्द्रीय सल्लाहकारया रुपय् सम्मान याःगु खः। वय्कः तसकं सोझाम्ह तर असल कार्यकर्ता कथं कयातःम्ह ख्वपया किसान न्ह्यलुवा खः। वय्कःया सरल व्यवहार तर कठोर प्रतिवद्धता सकस्यां निंतिं नालाकायेबहः जू ।