'राज्य पुर्नसंरचना आयोग संविधानसभाया क्षेत्राधिकार पिने'
सभामुख सभाषचन्द्र नेम्वाङं संविधानसभाया क्षेत्राधिकार पिनेया खँ हयाः संविधान निर्माणयात प्रभावित यायेत स्वयाच्वंगु खँ धयादीगु दु ।
रिपाटर्स क्लबं थौं येँय् याःगु साक्षात्कार ज्याझ्वलय् सभामुख नेम्वाङं शान्ति प्रक्रिया क्वचायेकेगु व राज्य पुर्नसंरचना आयोग गठन थज्याःगु विषय संविधानसभाया क्षेत्राधिकार दुने मलाःगु धयादिल । वय्कलं थज्याःगु खँ ल्ह्वनाः संविधान निर्माण प्रक्रियायात प्रभावित यायेगु ज्या जुयाच्वंगु धयादिल ।
संवैधानिक समिति दुने राज्य पुर्नसंरचना आयोग गठन यायेमाः वा म्वाः धइगु विषयलय् यक्व विवाद जुयाच्वंगु इलय् वय्क:या थ्व धापू सार्वजनिक जूगु ख: । माओवादी, एमाले लगायत मधेशवादी दलत आयोग गठन यायेम्वाःगु अडान कयाच्वंगु दुसाः कांग्रेस लगायत मेगू दलत आयोग गठन यानाः जक थुगु विषयया निर्णय यायेमाःगु खँ धयाच्वंगु दु ।
अथेहे साक्षात्कार ज्याझ्वलय् सभामुख नेम्वाङं संविधान निर्माणया झ्वलय् २१० विवादीत विषय मध्ये ३० जक विषयलय् सहमति जुइल्यँ दनीगु धयादिल । वय्कलं ल्यँदनीगु विषयलय् आपसी सहमतिया आधारय् याकनं हे क्वचाइगु विश्वास प्वंकादिल ।
छुं ई न्ह्यः निसें सभासद्तय्सं थःगु आचरण अःख ज्या यानाच्वंगु धयादिसें वय्कलं संविधानसभाया मूल्य, मान्यता व प्रकृया अःखा वनीपिंत कारवाहही यायेगु स्पष्ट यानादिल । वय्कलं ह्याँगु पासपोर्ट दुरुपयोग, एसएलसी लगायत विषय गम्भीर प्रकृतिया जूगु धयादिसें अज्याःगु गतिविधि याइपिंत कानून बमोजिम कारवाही जुइगु धयादिल ।
संवैधानिक समितिया मुँज्याय् दलित जनजाति पार्टीया सभासद् विश्वेन्द्र पासवानं मेच वांछ्वःगु घटनयात कयाः वय्कलं उगु घटनां संसदीय मूल्य व मान्यतायत हाथ्या बिउगु धयादिल ।
