माओवादीइ मन्त्री ल्ययेगु जिम्मा हेडक्वाटरयात
प्रधानमन्त्री झलनाथ खनाल नेतृत्वया सरकारय् ब्वति काइपिं मन्त्रीतय् नां ल्ययेत व पार्टी दुनेया आन्तिरिक विवाद ज्यंकेत च्वंगु एनेकपा (माओवादी) स्थायी समितिया मुँज्यां मन्त्री ल्ययेगु जिम्मा हेडक्वाटरयात ब्यूगु दु ।
पार्टी हेडक्वाटर कथं माओवादी नायः पुष्पकमल दाहाल 'प्रचण्ड'यात काइगुलिं आः थुगु निर्णय नापं मन्त्री ल्ययेगु जिम्मा वय्कःया ल्हाःतय् लाःगु दु । अथेहे पार्टी दुने स्वंगू समान्तर रुपं गठन जूगु मजदुरतय् विवाद ज्यंकेगु जिम्मा नं वय्क:यात हे ब्यूगु दु ।
निन्हुतक सिन्धुपाल्चोकया सिकुटेय् च्वंगु माओवादी मुँज्या लिपा आइतवाः याःगु पत्रकार सम्मेलनय् माओवादी नायः प्रचण्डं शान्ति व संविधान जोखिमय् लाःगु धयादिल । माओवादी नेतात शान्त वातावरणय् पार्टी दुनेया आन्तरिक विवाद व थीथी विषयलय् निर्णय याःगु धासें शनिवाः सिकुटे थ्यंकूगु खः ।
News Location:
